Markina-Xemeingo Zuhaitz eta Landare Azokak harrera ona eduki du aurten ere
COVID-19a dela eta murrizketak egon arren, egindako salmentekin pozik azaldu dira mintegietako arduradunak. Bertoko zuhaitz motak saldu dituzte batez ere.
Jendea landareak erosten 2021eko Zuhaitz eta Landare Azokan. Beste urteetan baino formatu txikiagokoa izan bazen ere, asko izan ziren zapatu goizean [otsailak 13] zuhaitz zein landareak erostera hurreratu ziren markina-xemeindarrak. Zelaiaren goiko partean jarri dituzte aurten azokan parte hartu duten mintegietako postuak. Bertan egon ziren Zaldibarko Areitio eta Belar mintegiak, Iurretako Ortuberri eta Beintza-Labaiengo Zubialde patxakak.
COVID-19a dela eta murrizketak egon arren, salmentak onak izan zirela jakitera eman zuten mintegietako arduradunek: “beste urte batzuetako mugimendurik ez dago, baina espero genuena baino gehiago”. Eguraldiak ere lagundu zuen, eta ekoizleak pozik agertu ziren herritarren erantzunagaz. Izan ere, zuhaixka eta landare poltsekin ikus zitekeen jendea azoka eremuaren inguruan.”Urte asko daramagu azoka honetara etortzen, eta oraingoan ez gara beste urteetako aurreikuspenekin etorri. Hala ere harreman oso ona daukagu antolatzaileekin eta ez dugu falta nahi izan”.
Urtero modura, bertoko zuhaitz motak saldu zituzten batez ere, intxaur txertatuak eta gaztainak. Horiez gain, harrera ona eduki zuten erosleen artean zitrikoak ere, limoiondoak eta laranjondoak, eta basoko landarek ere eraman zituzten erosleek besteak beste. “Negutegietan aurkitzen ez dutenaren bila datoz batez ere”. Landareei dagokionez, krabelinak eta pentsamenduak erostera animatu ziren asko.
Azoka gitxi edukitzen ari direla jakitera eman zuten mintegietako arduradunek; Markina-Xemeingoagaz gain Arrasaten eduki dute beste bat, Zuhaitz Egunagaz lotuta. Beste azoka guztiak bertan behera gelditu direla azaldu zuten, hala ere, egoera xamurra ez den arren egoerari “nahiko ondo” eusten ari direla esan zuten.
