Sestaoko hilketa matxistaren kontrako protestak egin dira Lea-Artibai eta Mutrikun
56 urteko emakume bat hil zuen senarrak barikuan [otsailak 12] Sestaon, eta ondoren bere buruaz beste egin zuen.
Sestaoko hilketa matxista salatzeko elkarretaratzea Markina-Xemeingo Goiko Portalean. Segurtasun Sailak jakinarazi duenez, 57 urteko gizonezko baten gorpua aurkitu zuten joan den bariku goizaldean [otsailak 12] Bilboko itsasadarrean, Sestao parean, eta familiari haren heriotzaren berri ematera joan zirenean aurkitu zuten andrearen gorpua etxean, indarkeria zantzuak zituela. Hilketa matxista hori gaitzesteko elkarretaratzeak egin dira Euskal Herriko hainbat herritan, bai eta Lea-Artibain eta Mutrikun ere.
Mugimendu feministek edo udalek egindako deialdiei erantzunez elkartu dira Lea-Artibai eta Mutrikuko bizilagunak protestan. Zapatu eguerdian [otsailak 13] irten ziren kalera Aulestin, Lekeition eta Markina-Xemeinen: elkarretaratze isila egin zuten Markina-Xemeingo Goiko Portalean, emakumeen kontrako indarkeriaren aurrean ahotsa altzatu behar dela aldarrikatu zuten Lekeitioko Eskolapean, eta nahikoa dela azpimarratu zuten Aulestiko plazan bildutakoek. Zapatu iluntzean egin zuten elkarretaratzea, berriz, Ondarroako Alamedan, eta domeka eguerdian [otsailak 14] egin zituzten salaketak Mutrikun, Etxebarrian eta Munitibarren.
Hilabete ere ez da igaro Aizarnazabalen Aintzane Pujana hil zutenetik, eta aurten Euskal Herrian hil duten bigarren emakumea da sestaoarra. 2003tik indarkeria matxistak 109 emakume hil ditu.
Aulestiko elkarretaratzea. Argazkia: Amaia Onaindia
Lekeitioko protesta.
Etxebarrian egindako elkarretaratzea. Argazkia: Arantza Loiola
