Bizum bidezko dohaintza kanpaina abiarazi dute, Angelman sindromea dutenei laguntzeko
Kanpainarekin bat egin nahi dutenek 01443 zenbakira Bizum bat egin beharko dute. Kanpaina zabalik dago otsailaren 28ra arte.
Otsailaren 15a Angelman Sindromearen Nazioarteko Eguna da, eta egun hori abiapuntutzat hartuta, #InvestigacionEsEsperanza leloa daraman diru bilketa kanpaina abian ipini du Espainiako Angelman Sindromearen Elkarteak. Gaixotasuna ikertzeko bidean oraindik ere bide luzea egiteko dagoela diote. Hori dela eta, ikerketara dirua bideratzea inoiz baino garrantzitsua dela azpimarratu dute.
Dirua ikerketara bideratzeko nahiarekin urtero hainbat ekintza antolatu ohi izan ditu elkarteak. Mutrikun, esaterako, elkartasun zumba ekitaldiak antolatzen zituzten urtero. “Elkarteko diru sarrerak ekitaldi presentzialei esker lortzen genituen orain arte. Pandemia dela eta, orain ezin da halako ezer antolatu. Horri erantzun bat eman nahian, sare sozialetatik zabaldu dugun Bizum bidezko diru bilketa kanpaina abiarazi dugu”, azaldu du Joseba Antxustegi elkarteko kide mutrikuarrak.
Bizum egiterako garaian dohaintza aukera aukeratzea nahitaezkoa dela gogorarazi dute
Otsailaren 28ra arte ekarpenak egiteko aukera zabalik egongo da. “Batutako diru guztia ikerketara bideratuko dugu. Gaur egun, esaterako, Ugo Mayor buru duen Euskal Herriko Unibertsitateko Zientzia eta Teknologia Fakultateko ikerketa talde bat gaia ikertzen ari da. Nagore Elu ikertzaile ondarrutarra ere taldeko kidea da”. Otsailaren 1ean abiatu zuten kanpaina, eta Espainia mailan erantzun oso ona jaso dute. Ekimen solidarioa abian ipini zutenez geroztik 13.000 euro batu dituzte. “Gure helburua 20.000 euro lortzea da”.
Ekarpenak Bizum bidez egiteko era “oso erraza eta erosoa” dela dio Antxustegik. “Norbanakoek zein enpresek parte hartu dezakete. Ekarpen guztiak ongietorriak izango dira, kopurua edozein delarik ere, laguntzeko ondo etorriko da”. 01443 zenbakira Bizum bat egin beharko dute kanpainarekin bat egin nahi dutenek. Gogogorazi duenez, dohaintza aukera aukeratzea nahitaezkoa da. Dohaintza egiten dutenek, gainera, kenkari fiskalak izango dituzte. “Eskatzen duten guztiei errenta aitorpena egiteko ziurtagiria bidaliko diegu. Interesa dutenek info@angelman-asa.org helbide elektronikora idatzi beharko dute”.
Elkarteari laguntzeko beste hainbat era ere badaudela esan du Antxustegik. “Elkartearen webgunean laguntzeko dauden aukera guztiak agertzen dira. Era tradizionalean, esaterako, banku transferentzia bidez ere egin daitezke diru ekarpenak edo denda birtualean eskura dauden produktuetako bat ere erosi daiteke. Diru ekarpenik egin ezin dutenek ere asko egin dezakete. Kanpainari buruzko informazioa lagunartean zabalduta ere gu pozik. Dena ez da diru bilketara mugatzen, gaixotasuna ezagutzera ematea ere bada gure helburua”.
