Edukiontzi grisera botatzen diren hondakinen %65 birziklagarriak direla ondorioztatu dute
Debabarrena Mankomunitateak ikerketa bat egin du, bi egun konkretutan hondakinak batzeko eskualdean dauden zortzi puntu aztertu dituzte. "Datuek birziklatze ohiturei buruzko gogoeta eragin behar digute", esan dute.
Zehaztu dutenez, urriaren 21ean eta 30ean egin zituzten azterketak eskualdean hondakinak batzeko dauden zortzi puntutan; edukiontzi grisak dira aztertu dituztenak. Eta ondorioztatu dute edukiontzi grisera botatzen diren hondakinen %65 birziklagarriak direla. Hondakin organikoak dira gehien erregistratu dituztenak (%32,6), baina plastikozko ontziak (%8,5), papera eta kartoia (%11,1) eta beira (%3,2) ere atzeman dituzte.
Hondakin organikoei dagokienez, aztertutako 1.977 kilotik 150 kilo (%7,4) elikagaien xahutze gisa identifikatzen diren hondakinak direla argitu dute. “Hau da, haragi eta arrain zatiak, ogia, pasta eta lekaleak”. Bestetik, 493 kilo (%25) elikagaien xahutze gisa katalogatzen ez diren hondakinak izan direla diote: lorategiko hondakinak, hondakin organikoak dituen sukaldeko papera… Horiek guztiak edukiontzi marroira bota beharko liratekeela diote.
Edukiontzi grisetan aztertutako hondakin guztien arten larru eta ehun ez sanitario gisa katalogatutako hondakinak ere aurkitu dituzte. “Horiek edukiontzi zurietara bota behar dira. Gero, planta batera bideratzen dira. Han, berriro erabili ahal direnak aukeratzen dituzte, eskatzen dituztenei bidaltzeko. Adibidez: Caritas, parrokiak, GKEak. Gainerakoak birziklatu egiten dira”.
“Edukiontzi grisera hondakin birziklagarriak botatzen baditugu, horien birziklapena eragozten ari gara eta, ondorioz, ingurumena kaltetzen”
Edukiontzi marroian, horian, urdinean edo berdean sartzeko hondakinak aurkitzeaz gain, garbiguneetara eramatekoak ere aurkitu dituztela esan dute. “Tresna elektriko eta elektronikoen hondakinak (%1,1) eta tamaina hnadiko hondakinak (%1,5) ere erregistratu ditugu. Beraz, herritarrei dei egiten diegu horiek garbiguneetara eramateko”.
Debabarrena Mankomunitateak Gipuzkoako Foru Aldundiarekin elkarlanean egin du azterketa, eta esan dute datuek biriziklatze ohiturei buruzko gogoeta eragin behar dutela. “Datuek hobetzeko asko daukagula erakusten dute”. Eta azpimarratu dute edukiontzi griseko hondakinak ezin direla birziklatu. “Edukiontzi horretara hondakin birziklagarriak botatzen baditugu, horien birziklapena eragozten ari gara eta, ondorioz, ingurumena kaltetzen”.
Gogorarazi dute 2030erako %70eko gaikako bilketa lortzea dutela helburu, eta nahiz eta iaz %55era iristea lortu zen, %70era heltzeko oraindik bide luzea dagoela egiteko gaineratu dute. “Helburu hori lortzeko ezinbestekoa da herritar guztien inplikazioa eta konpromisoa”.
