Gatibuk bi kontzertu akustiko eskainiko ditu Lekeition
Emanaldiak martxoaren 18an izango dira, 18:15ean eta 19:45ean, Ikusgarri zinema aretoan. Lehenengo emanaldirako sarrerak 24 ordu baino gutxiagotan agortu dira, eta bigarren emanaldirako sarrerak otsailaren 17an jarriko dituzte salgai, ohiko lekuetan.
Lekeitioko Zinemazaleen Elkarteak antolatuta, Gatibu musika talde ospetsuak bi kontzertu akustiko eskainiko ditu martxoaren 18an, Lekeition. Hasiera batean, kontzertu bakarra eskaintzea zen asmoa (19:45eko saioa), baina lehenengo emanaldi horretarako sarrerak 24 ordu baino gutxiagotan amaitu direla eta, taldeak bigarren emanaldi bat eskaintzea erabaki du (egun berean, 18:15ean). Azken horretarako sarrerak bihar [otsailak 17] jarriko dituzte salgai, 15 eurotan.
Zuzeneko emanaldietarako indarrean dauden neurriak direla eta, taldeak ohiko errepertorioa formatu berri batera egokitu duela esan dute, “oholtzatik kantak zaleekin partekatzeko”. Aurreratu dutenez, Lekeitioko emanaldian taldearen diskografiako abestirik ezagunenak entzuteko aukera egongo da, baina Musikak salbatuko gaitu disko berriko kantak ere eskainiko dituzte.
Sarrerak Zinemazaleen webgunean eta Zerbyte informatika dendan (Kolmenares Kalea, 6) erosi ahalko dira. Eta, betiko modura, soberan geratuko balira emanaldia eskainiko duten egunean bertan txarteldegian salduko lituzkete.
