Apirilaren 8an amaituko da Mutrikuko Ziriako Andonegi sariketara lanak aurkezteko epea
Gaia librea da eta, gehienez ere, 100 berbako kontakizunak jasoko dituzte. Parte hartzaileek nahi beste lan bidali ahal izango dituzte.
Abian da beste behin ere Mutrikuko Ziriako Andonegi Mikroipuin Lehiaketa. Bertan parte hartu nahi dutenek apirilaren 8rako aurkeztu beharko dituzte lanak. Antolatzaileek iragarri dutenez, lanak aurkezteko modu bakarra egongo da; kultura@mutriku.net posta elektronikoan jasoko dituzte lan guztiak. Parte hartzaileek bidaltzen duten mezuari bi fitxategi erantsi beharko dizkiote: batean, idazlana bidaliko dute goitizenez sinatua eta, bestean, egilearen datu guztiak, nortasun agiriaren kopia barne.
Edonork parte hartu ahal izango du lehiaketan, eta bakoitzak nahi beste lan aurkezteko aukera edukiko du. Hori bai, egile bakoitzak sari bakarra jaso ahalko du. Gaia librea da eta, gehienez ere, 100 berbako kontakizunak jasoko dituzte. Lanak, gainera, euskaraz idatziak, originalak eta argitaratu gabeak izan beharko dira.
Ohi modura hiru sari banatuko dituzte:
- 18 urtetik gorakoen lan onena: 500 euroko saria.
- Mutrikuarren arteko lan onena: 200 euroko saria.
- 18 urtetik beherakoen lanik onena: 200 euroko saria.
Epaimahaia Mutrikuko Kultura Batzordeak izendatuko du eta hartzen duen erabakia aldaezina izango da. “Aurkeztutako lanek maila egokirik ez balute, sasriak eman gabe gera litezke”.
