Haurreskoletako langileek elkarretaratzeak egingo dituzte Lekeition eta Berriatuan
Haurreskolak partzuergoaren doakotasuna eta Hezkuntza Sailean integratzea eskatzen dute, besteak beste. Eguaztenean amaituko dituzte lanuzteak.
Haurreskolak partzuergoko langileek mobilizazioekin eta greba egunekin jarraitzen dute. LAB, Steilas eta ELA sindikatuek lanuzteak deitu dituzte gaur [otsailak 22], bihar [otsailak 23] eta etzirako [otsailak 24]. Lea-Artibai eta Mutrikuko haurreskolek ere bat egin dute lanuzteekin, baina grebak zentro guztietan ez duela berdin eragingo esan dute. “Gutxieneko zerbitzuak ematera derrigortuta gaude. Zentroetan, gutxienez, bi hezitzaile geratu behar dira. Eskualdeko haurreskola batzuetan bi hezitzaile daude, beraz, ezingo dute lanuzterik egin. Beste batzuetan, ostera, gehiago garenez, txandakatzen joateko aukera edukiko dugu”.
Gaur hiriburuetan elkarretaratzeak burutu dituzte, eta bihar, ostera, hainbat herritan mobilizazioak antolatu dituzte haurreskolako hezitzaile eta familiek. Eskualdean ere batzeko deia egin dute. Lekeition 16:15ean batuko dira Eskolapean. Berriatuan, berriz, herriko plazako kioskoan 16:30ean batzeko hitzordua ipini dute. Dinamikak eguaztenean amaituko dituzte, Lakua inguratuko duen manifestazioarekin.
Sei aldarrikapen nagusi kaleratu nahi dituzte egunotan: Haurreskolak partzuergoaren doakotasuna eta Eusko Jaurlaritzako Hezkuntza Sailean integratzea, akordioak “errespetatzea eta betetzea”, lan hitzarmen berria negoziatzen hastea, lanpostuak egonkortzea, Haurreskolak partzuergoko langileei ere Osakidetzak Norbera Babesteko Ekipamenduak ematea eta aurrekontua handitzea.
Hezkuntza Sailaren berririk gabe jarraitzen dutela salatu dute sindikatuek; azkenengo mahai negoziatzailetik bi hilabete igaro badira ere, ez dutela erantzunik jaso esan dute. “Lotsagarria eta erantzukizun politiko eskasa izatea iruditzen zaigu Hezkuntza Saileko arduradunen negoziatzeko borondate eza eta langileon aldarrikapenei horrela muzin egitea. Isiltasun hau negoziazio kolektiboaren kontrako eraso zuzena eta alde sozialaren lana oztopatzeko eta ikusezin bihurtzeko ahalegina dela salatu nahi dugu”.
