Azkenaldiko lapurretek ezinegona eragin dute Ondarroako dendari eta ostalarien artean
Eskudun erakundeei lapurretei konponbide bat emateko eta segurtasun aldetik, neurriak gehitzeko eta gaueko zaintza handitzeko eskatu dute.
Azken boladan hainbat lapurreta edo lapurreta saiakera egon dira Ondarroan; egoeragaz kezkatuta eta arduratuta agertu dira dendariak eta ostalariak. “Aurreko astean eta aurreragokoan, esaterako, fruta denda batean, lurrindegi batean eta taberna batean sartzen saiatu ziren lapurrak. Gaur [otsailak 23] goizaldean, berriz, beste taberna batean egin dute saiakera”, azaldu dute Zatozte merkatari elkarteko kideek.
Kasuak geroz eta gehiago direla salatu dute, eta egoera “errepikakorragaz” nekatuta daudela diote. Nabarmendu dutenez, batez ere gauez gertatu dira lapurreta edo saiakera horiek, nahiz eta etxeratze agindua ezarrita egon. “22:00etatik 06:00etara bitartean jazo dira gertaera hauek, berez kalean jenderik ibili ezin den ordutan. Bart gaueko lapurretan, esaterako, auzotarrek ere ez dute ezer sumatu”.
Zatoztetik adierazi dutenez, ezinegona nabaria da elkarteko bazkideen artean. Pandemiaren eraginez negozioekin aurrera egitea zaila den une hauetan, lapurreta boladagaz egoera zailtzen ari dela azpimarratu dute. “Pandemiak eragiten digun desegonkortasuna txikia ez bada ere, orain herriko hainbat denda eta tabernatan gertatzen ari diren lapurretak gehitu zaizkigu”. Eskudun erakundeei lapurretei konponbide bat emateko eta segurtasun aldetik, neurriak gehitzeko eta gaueko zaintza handitzeko eskatu diete. “Udaltzaingoagaz eta Ertzaintzagaz harremanetan jarri gara, eta zainketa areagotzeko eskatu diegu”.
Azken lapurreten harira Ondarroako Udalak ere kezka agertu du. Zunbeltz Bedialauneta Ibaibarriaga alkateak esan du Ondarroako Udala ere jarri dela harremanetan Ertzaintzagaz. “Udaltzaingoa eta Ertzaintza harremanetan daude bien artean lapurretak eta saiakerak nork egin dituen argitzeko eta gehiago ez gertatzeko neurriak hartzeko”. Alkateak gaineratu duenez, lapurretak eta lapurreta ahaleginak gauez gertatu dira. “Ordu horietan Udaltzaingo zerbitzurik ez dagoen arren, Ertzaintzagaz harremanetan jarrita gaude berriro ez gertatzeko neurriak hartzeko”.
