Minbizia dutenei laguntzeko itsulapikoak ipini dituzte Mutrikun
Batutako dirua elkarteak Eibarko egoitzan eskaintzen dituen arreta indartzera eta zerbitzuak gehitzera bideratuko dute.
AECC Mutriku Elkarteko boluntarioek herriko saltokietan ipini dituzten itsulapikoak eta zozketen txartelak AECC Gipuzkoa elkartea Minbiziaren aurkako astea ari da ospatzen egunotan. Eta hori abiapuntutzat hartuta, hainbat ekimen antolatu dituzte Debabarrena mailan. Mutrikun, esaterako, diru bilketa kanpaina berezia abiarazi dute. “Pandemia dela eta, ezin dugu ohiko diru-bilketarik egin kalean. Hori dela eta, herriko dendetan itsulapikoak utzi ditugu nahi duten herritarrek ekarpenak egiteko”.
Herriko 26 saltokitan banatu dituzte itsulapikoak, eta horiekin batera, zozketa txartelak ere ipini dituzte salgai. “Euro baten truke elkartasun otarre bat irabazteko aukera egongo da”. Mutrikuko AECC elkarteko boluntarioek adierazi dutenez, itsulapikoak eta zozketa txartelak martxoaren 8ra arte egongo dira eskuragarri. Zozketa, ostera, martxoaren 10ean egingo dute.
Batutako dirua elkarteak Eibarko egoitzan eskaintzen duten arreta indartzera eta zerbitzuak gehitzera bideratuko dute, “pazienteei eta senideei doan eskaintzen dizkiegun zerbitzuak areagotzeko eta minbiziak jotako biztanle gehiagorengana iristeko”.
