Hainbat aukeragaz dator Ondarroako Merkatu txikia
Merkatu txikia domekan egingo dute 10:00etatik 15:00etara Alamedan. Osasun egoera dela eta, aparteko neurriak hartuko dituzte.
Udaberria ate joka datorrela eta, Merkatu txikia antolatu du Zatoztek domekarako [otsailak 28]. 10:00etatik 15:00etara bitartean Ondarroako Alamedan ipiniko diren hainbat erakusmahaietan banatuta, udazken eta neguko produktuen aukera zabala edukiko dute esku-eskura erosleek.
Zatozteko arduradunek aurreratu dutenez, zazpi saltoki batuko dira merkatu gunean. “Betiko moduan, dendetan ditugun kalitate bereko salgaiak erosi ahalko dira, baina prezio txikiagoetan eta bezeroarentzat deskontu interesgarriekin. Helduen eta umeen oinetakoak, helduen jantziak, barruko arropa… bertaratzen direnek askotariko produktuak erosteko aukera izango dute. Domekan, gainera, herriko marka propioa duen saltoki batek egin dituen diseinuak erakutsiko dituzte estreinako”.
Bizi dugun alarmak hala behartuta, eta jende pilaketak saiheste aldera, neurri bereziak hartuko dituztela iragarri dute. “Pandemiak eskatzen duen egoerari egokituta, bestelako neurriak ere hartuko ditugu. Zein norabide jarraitu behar den gezi batzuekin markatuta egongo da. Betiere, zirkuitua norbere eskumatik egitea eskatuko dugu; norabide hori jarraitzea eskertuko dugu, jendea kontran ez gurutzatzen ibiltzeko. Bertaratzen direnei, gainera, euren artean distantzia mantentzeko ere gogorarazi nahi diegu”. Gaineratu dutenez, dendari bakoitzak hidrogela ere edukiko du bezeroen eskura.
