Ziklomotorren azterketa teknikoa Ondarroan egiteko aukera egongo da
Ondarrutarrek zein inguruko herrietakoek egin ahalko dute azterketa teknikoa Ondarroan. Interesatuek Udaltzaingoan izena eman beharko dute.
Bizkaian sei herritan egongo da azterketa teknikoa herrian bertan egiteko aukera, eta Ondarroa horietako bat izango da. “Udaltzaingoa lanean aritu da zerbitzu hau herrian bertan eskaini ahal izateko, eta lortu egin dute. Kontuan hartuta Bizkaian bakarrik sei herritan eskainiko dela uste dut albiste azpimarragarria dela”, esan du Zunbeltz Bedialauneta alkateak.
Udal iturriek jakitera eman duenez, azterketa teknikoa apirilean egingo dute, baina aurretiaz izena eman beharko da. Interesatuek martxoaren 1etik 19ra bitartera Ondarroako Udaltzaingora hurreratu beharko dute. Gaineratu dutenez, ziklomotorren azterketa teknikoa ondarrutarrek zein inguruko herrietakoek pasa ahalko dute Ondarroan.
Berritasun modura, ordainketa Udaltzaingoan bertan egin ahal izango da estreinako. “Dirua hemen jasoko dugu eta gero gu arduratuko gara zerbitzua diru horrekin ordaintzeaz. Horrela egin ezean, gidariak Atxondora joan beharko lirateke tasa ordaintzera, nahiz eta zerbitzua Ondarroan jaso. Bidezkoagoa ikusten dugu ordainketa ere hemen egitea, eta are gehiago COVID-19are arazoagaz. Dokumentazio guztia, aldiz, azterketaren egunean bertan aurkeztu beharko zaie bertako langileei”.
Zehaztu dutenez, apirilaren 21ean egingo dute lehen azterketa teknikoa, baina eskariaren arabera egun bat edo gehiagotan etorriko dira. “Izena ematen duten pertsona kopuruaren arabera erabakiko dute zenbat egunetan etorriko diren Ondarroara”.
