Denboraldiko lehen antxoa kiloa lau euro inguru ordaindu da Ondarroan
Galiziako 'Os Xuxos' ontziko marinelek deskargatu dituzte lehen garauak. Ondarroatik oso gertu arrantzatu dute arraina; oro har, tamaina txikiko antxoa saldu da bentan.
Galiziako 'Portosin Dos' ontziko marinelak, antxoagaz Baxurako arrantzale tradizionalak hasi dira kosterako lehen antxoa porturatzen. Gaur [martxoak 1] 09:00etan zabaldu dute kostera ofizialki, eta lehen garauak eguerdirako ikusi ahal izan dira Ondarroako portuan ere. Eguerdian, guztira, 3.000 kaxa inguru (24.000 kilo) deskargatu dituzte lau ontzik Egidazu Kaian. Tamaina txikiko arraina izan bada ere (kiloan 60-70 ale ingurukoa) nahikoa prezio onean saldu da bentan, 4 euro inguruan; 4,10 eurotan saldu dute sortarik garestiena eta 3,14 eurotan merkeena.
Antxoa Ondarroan porturatzen lehenak Camariñasko (Galizia, Espainia) Os Xuxos ontziko marinelak izan dira; 12:00ak inguruan porturatu dira. 140 kaxa antxoa deskargatu dituzte, eta sorta osoa Pescados Llorentek erosi du 12:30ak bueltan egin duten lehen bentan; 3,87 euro ordaindu dute kiloa. “Freskorako salduko dugu”, azaldu dute arrain erosleek.
‘Manilo’ ontziko marinelak antxoagaz
Os Xuxos ontziko arrantzaleak “nahikoa konforme” geratu dira prezioagaz. Â “Harrapatu dugun kopurua ez da oso handia, baina duen tamainarentzat prezio onean saldu da”, agertu du Santiago Leis patroiak. Denboraldiko lehen antxoa aleak lehorreratzen lehenak izatea ere pozgarria dela gaineratu du.
Ondarroatik ordu erdi ingurura arrantzatu dute antxoa, 4 bat miliatara, Lekeitio parean. “09:00etan itsasoratu gara, eta sareratu ditugun lehen kaxekin porturako bidea hartu dugu. Arraina deskargatu eta berriro itsasoratuko gara. Arratsalderako berriro arrainagaz lehorreratzeko asmoa dugu”.
13:00ak bueltan, beste hiru ontzik (Manilo, Kantauri eta Portosin Dos) harrapatutako antxoa ere saldu dute lonja berriko bentan. Ikusmin handia sortu dute denboraldiko lehen antxoa garauek, eta bentalekua antxoa gosez zeuden eroslez bete-bete egon da.
‘Kantauri’ ontziko marinelak antxoa deskargatzen
