Mutrikuko Udalak iaz baino aurrekontu handiagoa edukiko du
Inbertsio nagusiak, aurten ere, gerakinetik gauzatuko dituzte.
Mutrikuko aurrekontuaren bozketa. Argazkian, EH Bilduko kideak aldeko bozka ematen. Mutrikuko Udalak 7.430.655 euroko aurrekontua edukiko du 2021 urtean herriaren kudeaketarako. Egueneko osoko bilkuran eman zioten onespena aurrekontuari, eta 2020ko urtekoarekin alderatuta %3ko igoera dauka; zehazki, 216.455 euro gehiago edukiko dituzte ekitaldi berrirako. Aurrekontuaren norabideetako bat pertsona eta jarduera zaurgarriak krisialditik babestea izango dela azpimarratu du Joseba Palenzuela Mutrikuko alkateak.
Tokiko erakundearen inbertsio nagusiei dagokienez, aurten ere aurrekontuaren gerakinetik egingo dituztela iragarri dute. Gerakinaren diru kopurua oraindik zehazterik ez badago ere, kopurua 2,5 milioi euro ingurukoa izan daitekela gaineratu dute. “Kopuru hori egiteke dauden proiektuei aurre egiteko erabiliko dugu. Lanketa berezi bat egingo dugu burutu nahi diren jarduketekin”.
Iaz egin modura, 600.000 euroko mailegua eskatzea aurreikusiko du udalak
Besteak beste, honako proiektuak gauzatu nahi dituzte gerakineko diruarekin: lur publikoen erosketa proiektu bat, Jose Mari Alzibar eta Iriagirre kaleetako igogailuak, Egaña pilotalekuaren estalkia, energia berriztagarriak eta energia eraginkortasunerako inbertsio batzuk, Dentici guneko berriztapen lanak, komentuko teilatuaren konponketa lanak eta Iriagirre kalea urbanitzatzeko lanak.
Inbertsio errealetara, berriz, 662.800 euro bideratuko dituzte; iazkoarekin alderatuta, 227.150 euro gutxiago. Aurreikusitako inbertsioen artean, 110.000 euroko diru sail bat hainbat azterlan eta proiektu idaztera bideratuko dute. “Hurrengo urteetan gauzatzeko planak diseinatzeko eta proiektuak idazteko izango da zenbateko hori”.
Iaz egin modura, aurten ere mailegu bat eskatzea aurreikusi du udalak. Zehazki, 600.000 euroko mailegua eskatzea aurreikusi dute. “Aurrekontuari lagundu ahal izateko tresna modura erabiltzea da gure asmoa. Kreditu hori aurrekontuetan jaso baldin badugu ere, ez dugu espero eskatu beharko dugunik”.
Eztabaida udal taldeen artean. Aurrekontua adosteak, aurten ere, eztabaida eragin du udal gobernu taldearen eta oposizioaren artean. EH Bilduko sei zinegotziak (Haizea Egañak ez zuen bozketan parte hartu) aurrekontua onartzearen alde agertu ziren. EAJren bost zinegotziak, berriz, aurka agertu ziren. B+Iko zinegotzi bakarra abstenitu egin zen.
