1976ko martxoaren 3an Gasteizen hildako langileak oroituko dituzte Ondarroan
Elkarretaratzea eta lore eskaintza antolatu dituzte Alamedako monolitoaren aurrean.
1976ko martxoaren 3ko sarraskia gogoratzeko ekitaldia egingo dute eguaztenean [martxoak 3], 19:00etan, Alamedako monolitoaren parean. Aurten 45 urte beteko dira langileen eskubideen defentsan borrokan zeuden bost langile erail zituztela Gasteizen, eta data esanguratsu hori baliatuta, elkarretaratzea eta lore eskaintza antolatu dituzte LAB sindikatuak eta Ernai Gazte Antolakundeak.
Langile mugimenduaren ikur bihurtu da eguna, eta 45 urte geroago ere, oroimenak bizirik jarraitzen duela azpimarratu dute. “Gure aitortza eta gogoa Pedro Mari Martinez Ocio, Francisco Aznar, Romualdo Barroso, Jose Castillo eta Bienvenido Peredari, eta baita Gasteizko sarraskia salatzeko elkartasun manifestazioen aurkako errepresioaren ondorioz hil zirenei ere”.
Gasteizko sarraskia, hain zuzen, langileriak Euskal Herrian inoiz jasan duen erasorik latzena izan da. Greba egun bat zen, eta 5.000 pertsona inguru zeuden batzar batera joanda, Gasteizko Zaramaga auzoko Asisko San Frantzisko elizan. Batzar baketsua desegiten saiatzeko, eliza gaseztatu eta istiluen aurkako materialarekin eraso zituen barruan bildutakoak. Elizan bildutakoek izututa eta itota ihesi atera ziren, eta polizia kolpeka eta tiroka oldartu zen bereizketarik egin barik. Poliziek 2.000 tiro baino gehiago egin zituzten, 150 zauritu egon ziren, eta horietatik bost bertan hil ziren.
