Lekeitioko Elikagaien Bankuak bere ibilbideari berrekin dio
Hamazazpi laguneko boluntario taldea jarri da lanean. Lehen banaketa egin dute otsailean.
Lekeitioko Elikagaien Bankuak aurrera jarraitzen du. Hamazazpi boluntarioko lantaldeak kolpe dio egitasmoari, eta otsailean egin dute lehen banaketa. Uribarren Abaroako pertsona bat arduratuko da koordinazioagaz, eta boluntarioak arduratuko dira kudeaketagaz.
Hainbat urtez ardura horretan aritu ondoren, joan den urteko ekainean utzi zuen egitasmoa aurreko taldeak, eta ordutik, Lekeitioko Udala egon da horren gainean. Azaldu dutenez, nahiz eta udalaren zerbitzu bat ez izan, momentu horretako egoera ikusita, Elikagaien Bankua ezin zela bertan behera gelditu ebatzi zuten. “Gurutze Gorriagaz egin genuen hitzarmena abendura arte, eta Uribarren Abaroa Fundazioagaz ere egin genuen berba ia eurak zeregin horregaz jarraituko luketen jakiteko. Lokala euren egoitzan egonik, elikagai bankua ere euran helburu sozialen baitan gehitzeko aukerarik zeukaten galdetu genien eta erantzuna baiezkoa izan da”, azaldu du Amaia Antxustegi Ziarda Gizarte ongizateko zinegotziak.
Elikagaien Bankuaren jarduna eramateko, baina, boluntarioak behar zituzten, eta horretarako deialdi bat egin zuen udalak urtarrilean. Guztira, hamazazpi lagun aurkeztu dira, eta jadanik hasi dira martxan. Udala arduratu zen urtarrileko banaketagaz, baina otsailekoa boluntarioek egin dute. “Indar handiz” eta “ilusioz bete” jarri direla martxan azpimarratu du Antxustegik: “Jubilatuak, gazteak, adin ertainekoak, lagunak, bikoteak, denetarik dago, eta gogo handiagaz daude”.
Boluntarioen taldeak martxa hartu bitartean udala hor egongo dela azaldu du Gizarte ongizateko zinegotziak, baina gero euren kasa ariko dira. Bizkaiko Elikagaien Bankuagaz ere hitz egin dute boluntarioekin hartu emanetan jartzeko eta bilera bat egitekoak dira.
Hilean behin. Elikagaien Bankuak hilean behin egiten du banaketa oinarrizko beharrak dituztenen artean. Guztira, 84 familiak eskuratzen dute janari sorta Lekeitioko Elikagaien Bankuan; 205 pertsona dira. Hiru barikutan egiten dute banaketa, goizez eta arratsaldez, eta jarritako txandan joaten dira familiak janariaren bila.
Elikagaien Bankuko erabiltzaile denek gizarte zerbitzuetako balorazioa pasatzen dute, eta udaletxetik eguneratzen dute zerrenda. Boluntarioak janaria jaso, zenbatu, sortak antolatu eta banatzeaz arduratuko dira besteak beste.
Elikagaien Bankuko lokala berez, Uribarren Abaroa egoitzan dago, baina pandemiagatik ezin da erabili. Beraz, bitartean, udalak Padre Aldamiz Etxebarria kalean daukan lokal bat erabiltzen ari dira.
