Quincoces eta De Diego hamabigarren sailkatu dira Binakako Munduko Distantzia Luzeko Txapelketan
Mendexarrak esan du "oso gustura" ibili dela denboraldi honetako probarik "gogorrenean". Bestalde, Marta Ribagaz jokatuko du Bikotekako Espainiako Txapelketa, asteburu honetan.
35. Pierra Menta edizio berezia izan da, Binakako Munduko Distantzia Luzeko Txapelketa lehiatu baitute. Horrez gain, egoerara egokitu dute mendi eskiatzaileentzat hain berezia eta kuttuna den lasterketa. Aurrekoetan ez bezala, lau etapetan egin ordez, bakarrean lehiatu dute, eta parte hartzaile gutxiagora mugatu dute. Hain zuzen, federazioen bidez zihoazenek bakarrik egin ahal izan dute.
Barikuan lehiatu zuten, eta Nahia Quincoces mendexarra eta Fatima de Diego madrildarra hamabigarren sailkatu ziren. Andorran lehiatutako Munduko Txapelketetan gertatu modura, Pierra Mentan ere, emakumezkoetan zein gizonezkoetan italiarrak izan dira nagusi. Emakumezkoen podiumean, Alba De Silvestro eta Giulia Murada italiarrak izan ziren onenak. Italiako selekzioko Ilaria Veronese eta Mara Martini sailkatu ziren bigarren, eta Frantziako taldeko Axelle Gachet-Mollaret eta Lorna Bonnel hirugarren.
Argazkia: Dymages
Denboraldi honetako probarik gogorrena izan da eurentzat. Etapa bakarra, baina oso luzea izan zen. Parte hartzaileek 31 kilometroko lasterketan, 3.600 metroko desnibelari aurre egin behar izan zieten. Bost ordutan burutu zuten lasterketa, eta Mendexakoak esan du “oso gustura” ibili zirela: “Egin ditugun beste lasterketak ez dira heldu bi ordura. Denboraldi honetan egin ditugunekin konparatuta, oso luzea izan da, baina, ibilbide oso polita egin zuten. Igoera eta jaitsiera pila bat eduki zituen, eta hiru zati oinez. Zati bat gailur-lerro batean zen, kit ferrata eroan behar izan genuen, eta sokan lotu”.
Ohituta daudenerako, igoerak zein jaitsierak oso desberdinak, oso luzeak direla zehaztu du: “Beste modu batera erregulatu behar da”. Quincocesek eta de Diegok ondo ulertu zuten elkar: “Oso ondo moldatu ginen”. Hasieratik ezarritako erritmoari eutsi zioten amaierara arte: “Jaitsiera zati batzuk konplikatu samarrak egon ziren. Baina, pozik aritu ginen. Luxua izan da aurten parte hartu ahal izatea”.
Hurrengoa, Espainiako bikotekakoa. Bikotekako Espainiako Txapelketa jokatuko dute domeka goizean [martxoak 21], Candanchun (Huesca, Aragoi). Quincoces Marta Riba katalanagaz ariko da. “Lasterketa asko egin ditut beragaz, lagun handia da, eta ondo pasatzera eta ahal den guztia egitera joango gara”.
