'Garen hori' liburua aurkeztu du Ana Urkizak
Euskal balioen inguruan hausnartzeko eginda dago liburua. Euskal Herriko hamasei sortzaile eta aditu elkarrizketatu ditu ondarrutarrak balio horien inguruan hausnartzeko eta gogoeta egiteko.
Ana Urkiza 'Gare hori' liburuagaz, Donostiako Artzai Onaren Plazan. Argazkia: Elkar argitaletxea. Ana Urkiza idazle ondarrutarrak Elkar argitaletxeagaz argitaratu duen Garen hori liburua aurkeztu du gaur [martxoak 16] Donostiako Koldo Mitxelena kulturgunean. Egileak azpimarratu duenez, argitaratu berri duen lana euskal balioen inguruan hausnartzeko eginda dago. “Balioen inguruan iruditzen zitzaidan ez zegoela behar beste eginda, edo behintzat ez zegoen eginda niri ezaguna zitzaidan besteko azterketarik; hori da nire buruari jarri nion erronka”.
Eta balio horien inguruan hausnartzeko eta gogoeta egiteko, hamasei sortzaile eta aditu eduki ditu konplize. “Ekarpen benetan berezi, onak, frankoak, freskoak eta nahikoa kritikoak direla esango nuke”. Alde batetik, zortzi sortzaile elkarrizketatu ditu, nor bere alorretik eta esperientziatik berbetan aritu dira. Elkarrizketa horiek osatzen dute liburuaren zati nagusia, eta horiei lehen lerroko komunikatzaileak diren beste zortzi adituren gogoetak gehitzen zaizkie. “Sortzaile eta aditu horiek elkarrizketatu ditut eta beraiei galdetu diet euren diziplina horretan zer balio eskaintzen dituzten edo azaleratzen dituzten, eta baita nitik gurako ibilbide hori ere nola bizi duten”.
‘Garen hori’ liburuaren aurkezpena. Ana Urkiza, erdian, liburuan elkarrizketatu dituen beste hainbategaz batera. Argazkia: Elkar argitaletxea.
Liburua idazteko idea galdera bakar batetik sortu zela adierazi du egileak. Honakoa zen galdera: zeintzuk dira euskal balioak? “Galdera horretara beste hiru galderatatik heldu nintzen. Eta abiapuntu hori hartuta, diziplina bakoitzeko sortzaile bat elkarrizketatu nuen. Sortzaile hauei lau gai nagusiri buruzko galdeketak egin nizkien”.
Hausnartzen aritu diren balio horiek bata bestearen atzetik ez direla zerrendatuta agertzen iragarri du Urkizak, baina bai agertzen direla. “Zortzi balio ateratzen dira guztien artean esandako horretatik: herri izateko borondatea; euskara eta euskal kultura; auzolana, kooperazioa, elkarlana, elkartasuna eta kooparatibismoa osatzen duen halako kontzeptu nagusi bat; ekintzailetza, berrikuntza eta erronka zaletasuna; lana; berdintasun politiko eta soziala; gastronomia; eta, azkenik, ahoztasuna eta bat-batekotasuna. Balio horiek ez dira behin agertzen, gurutzatuta ere agertzen dira”.
