Pfizer etxearen 10 milioi dosi gehiago iritsiko dira Europako Batasunera uda aurretik
Akordioa sinatu dute Europako Batzordeak eta enpresa farmazeutiko horrek, eta hasieran adostu baino 10 milioi dosi gehiago iritsiko dira uda aitzinetik Europako Batasunera.
EB Europako Batzordeak Pfizer-BioNTech enpresa farmazeutikoarekin adostu du COVID-19aren aurkako txertoaren 10 milioi dosi aurreratzeko. Hasieran, urtearen bigarren erdian zen jasotzekoa EB txerto horiek, baina, lortutako akordioari esker, urtearen bigarren hiruhilekoan iritsiko dira, hau da, uda aurretik. Txerto gehiago iristeak, beraz, txertaketa kanpaina azkartzea eragingo luke.
Ursula Von der Layen Europako Batzordeko presidenteak nabarmendu du estatu kideentzat oso garrantzitsua dela txerto horiek uda aurretik jasotzea, txertaketa kanpaina diseinatzeko. Horiek horrela, aurreratutako 10 milioi txertoekin, EBk 200 milioi txerto jasoko ditu urtearen erdirako. Guztira, EBk 500 milioi txerto erosi dizkie Pfizerri eta BioNtechi, eta beste 100 milioi gehiago erosteko aukera du.
Europako Batzordeak asteak daramatza esaten apirila eta ekaina bitartean txerto guztien 300 milioi dosi jasotzea espero duela. Batzordearen hitzetan, epe hori “kritikoa” da uda bukatu aurretik helduen %70 txertatuta egoteko.
Europako Botiken Agentziak onartutako lehen txertoa izan zen Pzifer-BioNTech enpresak garaturikoa.
