Sexismoari eta pornografiari buruzko saioak antolatu dituzte Ondarroan
Saio batzuk hezkuntza ez formaleko hezitzaileentzei eta beste batzuk gurasoei zuzenduta egongo dira. Parte hartzeko ez da aurretik izenik eman behar.
Hezitzaileei eta gurasoei bideratutako saio bereziak antolatu ditu Ondarroako Udalaren Hezkidetza Egitamoak. Alde batetik, Sexismoa eskolan eta aisialdian deritzon formakuntza saio bi eskainiko dituzte hezkuntza araututik haratago lanean aritzen diren hezitzaileentzako eta, bestetik, Zure seme-alabek pornoa ikusten al dute? familia eskolak antolatu dituzte gurasoentzako.
Hezitzaileei bideratutako saioei dagokienez, ordu eta erdiko saio bana eskainiko dute. Iragarri dutenez, saioek aforo mugatua edukiko dute eta osasun neurri guztiak hartuko dira; ez da izenik eman beharko. Herritarren ordutegietara egokitu ahal izateko, formakuntza egiteko bi egunetik bat aukeratu ahal izango da:
- Martxoak 18, 10:00etatik 11:30era, Etxelilan.
- Martxoak 24, 16:00etatik 17:30era, Etxelilan.
Irina Alkorta Bedialauneta berdintasun zinegotziak azaldu duenez, herri hezkidetzailearen bidean landu beharreko gaietako bat da saioetan landuko dutena. “Oso garrantzitsutzat jotzen dugu eskola orduetatik kanpo, eguerdi zein arratsaldeetan burutzen diren ekintzetan izan dezakegun begirada. Hezkidetzaren betaurreko moreak txertatu behar ditugu hezkuntzaren esparru guztietan. Hezkidetzaren oinarrietan murgiltzea helburu, hezitzaile guztien artean, gure praktiketan topatzen ditugun egoerak aztertu eta hausnartuko ditugu, eta elkarrekin hauek gure gazteengan izan ditzaketen eraginak aztertu”.
Hezkidetza Egitasmoko hezitzaileek ohartarazi dutenez, bestalde, zenbait ikerketek gazteen pornografia kontsumoa gero eta goizago hasten da. Gaiari buruzko familia mintegiak martxoaren 24an eta 25ean eskainiko dituzte Etxelilan; saioak 17:30ean hasiko dira. Horietan parte hartzeko ez da aldez aurretik izenik eman behar, baina osasun egoera tarteko, aforoa mugatuta egongo dela azpimarratu dute.
