Zazpi kasu gehiago erregistratu dituzte Lea-Artibai eta Mutrikun
Azken orduetan Ondarroan (3), Mutrikun (1), Markina-Xemeinen (1), Berriatuan (1) eta Amoroton (1) erregistratu dituzte kasuak. Araban, Bizkaian eta Gipuzkoan intzidentzia tasa igoten ari den moduan, Lea-Artibai eta Mutrikun ere joera hori mantentzen da. Osasun sailburuak "joera aldaketaz" ohartarazi du.
Joan den astearekin alderatuta, Lea-Artibai eta Mutrikuko intzidentzia tasa igoten ari da. Azken orduetan zazpi kasu gehiago erregistratu dituzte: 3 kasu Ondarroan erregistratu dituzte, eta bana Amoroton, Berriatuan, Markina-Xemeinen eta Mutrikun. Gotzone Sagardui Osasun sailburuak “joera aldaketa baten hasieran” egon gintekeela esan du. Hain zuzen, joera aldaketa horren erakusle da azken orduetan HITZAren eremuko hiru herritako tasak igo izana.
Iñigo Urkullu Eusko Jaurlaritzako lehendakariak ohartarazi du egoera epidemiologikoak “larria” izaten jarraitzen duela, eta ezinbestekoa dela herritarrek “zorrotz eta erantzukizunez” jokatzea. Etorkizuna “ziurgabea” dela uste du lehendakariak, eta zaila dela aurreikustea zein izango den kutsatzeen bilakaera datozen hilabeteetan, asteetan edo egunetan. “Ez daukagu erabateko ziurtasuna esateko kutsatzeen kurbak ez duela gora egingo”. Olatu bat bestearen atzetik etorri dela gogoratu du Urkulluk, eta ohartarazi laugarren olatu bat saihestea herritarren esku dagoela.
Herriz herriko intzidentzia tasa (eguneratuta):
- Amoroto: 1.204,82 (240 puntu inguru igo da)
- Aulesti: 0 (=)
- Berriatua: 318,22 (=)
- Etxebarria: 0 (=)
- Gizaburuaga: 0 (=)
- Ispaster: 0 (=)
- Lekeitio: 69,19 (25 puntu inguru jaitsi da)
- Markina-Xemein: 318,41 (80 puntu inguru jaitsi da)
- Mendexa: 0 (=)
- Munitibar: 0 (=)
- Mutriku: 169,36 (ia 20 puntu igo da)
- Ondarroa: 221,78 (25 puntu inguru igo da)
- Ziortza-Bolibar: 0 (=)
