Hizkuntza ohiturei buruz hausnartzeko eskariagaz dator aurten Arnasa Gara kanpaina
Martxoaren 22tik maiatzaren 16ra egingo dute kanpaina. Astero bideo bat zabalduko dute, sare sozialetan eta ohiko mezularitza aplikazioetan. Kanpaina amaitzen denean, Uemako kide diren udalerrietan bideoak aurkeztu eta tailer moduko hausnarketa saioak egingo dituzte.
Arnasa Gara kanpainaren aurkezpena. Argazkia: UEMA. Orain dela bi urte egin zuten Arnasa Gara kanpaina, eta aurtengo bigarren fasean, kanpainak bi helburu ditu: arnasguneek euskararen biziberritzean duten garrantzia gogoraraztea eta herritarren hizkuntza ohituren inguruko hausnarketa bultzatzea. “Herritarrak kontzientziatzera dator kanpaina hau, egunerokoan euskara nola erabiltzen dugun eta zernolako ohiturak ditugun hausnartzeko”, esan du Silvia Marañon Etxarri Aranazko alkateak. Herri horretan aurkeztu dute kanpaina Udalerri Euskaldunen Mankomuniatateak, Nafarroako Gobernuak eta Eusko Jaurlaritzak.
Zortzi bideo izango dira kanpainaren ardatz, eta datorren astetik aurrera astero bideo bat zabalduko dute, sare sozialetan eta ohiko mezularitza aplikazioetan. “Bideo hauek zerbait erakusten badute, hizkuntza ohiturak inertziaz errotuta ditugula da, eta horiek iraultzeko gure hizkuntzaren eta euskararen egoera soziolinguistikoaren inguruko hausnarketa eta pedagogia beharrezkoa dela. Horretan eragin nahi dugu bideo hauekin, eta bideo hauek zabaltzen bidelagun izango ditugunekin”, azaldu du Iraitz Lazkano Uemako lehendakariak.
Uemako lehendakariak gogoratu du arnasguneen aitortza eta arnasguneak sendotzea Uemaren izaeraren oinarrian dagoen zerbait dela eta, beraz, Arnasa gara kanpaina “bereziki garrantzitsua” dela Uemarentzat
Bideoak zabaltzeko, Euskal Herriko aktoreak, musikariak, kazetariak eta kirolariak izango dituzte lagun, eta horiekin Internet bidezko elkarrizketak ere izango dira astero sare sozialetan, bideoek lantzen dituzten gaien inguruan. Hain zuzen, Berria egunkariaren eta Arnasa Gara kanpainaren Instagram kanaletan ikusi ahal izango dira elkarrizketak. Ondokoak izango dira elkarrizketatuak: Ander Lipus markina-xemeindarra, Ainhoa Etxebarria ondarrutarra eta Iratxe Urkiaga lekeitiarra, Eñaut Elorrieta, Antton Telleria, Aitziber Garmendia, Sambou Diaby eta Erika Olaizola.
Kanpaina zortzi aste eta gero amaituko da, maiatzaren 16an. Orduan, Uemako kide diren herrietan zortzi bideoak aurkeztu eta tailer moduko hausnarketa saioak ere egingo dituzte. Era berean, Uemako kide diren herrietako eskoletan lantzen duten hezkuntza proiektuaren baitan ere bideo horiek erabiliko dituzte aurrerantzean, soziolinguistika edukiak eta hizkuntza ekologia eskoletan lantzeko prestatuta dituzten unitate didaktikoetan. Mutriku eta Lea-Artibaiko bederatzi udalerri hauek daude Ueman: Amoroto, Aulesti, Berriatua, Gizaburuaga, Lekeitio, Markina-Xemein, Munitibar, Ondarroa eta Ziortza-Bolibar.
Bingen Zupiria: “Kanpaina hau arnasguneei euskararen biziberritze prozesuan duten garrantzia eman eta zaintzen jarraitu nahi duen programa bat da”
Uemako lehendakariak gogoratu du arnasguneen aitortza eta arnasguneak sendotzea Uemaren izaeraren oinarrian dagoen zerbait dela eta, beraz, Arnasa gara kanpaina “bereziki garrantzitsua” dela Uemarentzat: “Uemak urte askoan esan eta aldarrikatu duena gaur egun hainbat erakunde publikok ere onartzen eta zabaltzen dutela ikustea ederra da”. Kanpainak “eredugarritasuna, elkarlana eta herritarren kontzientziazioa” batzen dituela azpimarratu du. Eredugarritasunari dagokionez, erakunde publikoak eredugarri izatea ezinbestekotzat jo du, herritarren hizkuntza ohituretan eragin ahal izateko: “Guk euskaraz egiten badugu, herritarrak ere bideratuko ditugu horretara. Bideo hauek horren inguruan hausnartzeko ere bidea ematen dute. Gurasoen rolen inguruko hausnarketa ere ageri delako, besteak beste”.
Bingen Zupiria Eusko Jaurlaritzako Kultura eta Hizkuntza Politika sailburuak ere elkarlanaren garrantzia eta herritarren kontzientziazioan eragiteko beharra nabarmendu ditu. Haren hitzetan, ekimen hau arnasguneei “euskararen biziberritze prozesuan duten garrantzia eman eta zaintzen jarraitu nahi duen programa bat da”. Euskararen Agenda Estrategikoan ezarrita dagoen modura, Hizkuntza Politika Sailburuordetzaren egitekoetako bat dela zehaztu du: “Euskara ohiko hizkuntza izango duten arnasgune eta funtzioak zaindu, indartu eta hedatzea, euskararen belaunaldiz belaunaldiko transmisioa bermatzeko eta erreferentzialtasun soziala indartzeko. Azken batean, helburua ez baita euskararen ezagutza zabaltzea, besterik gabe, baizik eta euskal hiztunak sortzea. Eta helburu hori erdiesteko bidea da guretzat programa hau”. Bide horretan, hizkuntza politikaren arloan erakunde desberdinen artean ematen den lankidetza ere azpimarratu du.
