AstraZenecaren txertoa 18 eta 65 urte artekoei ematea adostu dute
Oxfordeko Unibertsitateak eta AstraZeneca enpresak sortutako txertoak %79ko eraginkortasun maila du COVID-19aren sintomak prebenitzeko, eta ospitalizazioa eragiten duten sintomarik larrienei aurre egiteko, berriz, %100eko babesa ematen du.
Espainiako Osasun Publikoko Batzordeak erabaki du AstraZenecaren txertoa adin tarte gehiagotara zabaltzea: aurrerantzean, 18 eta 65 urte artekoei ematea proposatu du, La Vanguardia egunkariak aurreratu duenez. Hartara, Oxford-AstraZenecaren sendagaia emango zaie 65 urte artekoei, eta Pfizer eta Moderna enpresenak erreserbatuko dituzte, ostera, adin horretatik gorakoentzat eta bestelako patologiak dituzten gaixoentzat.
Osasun Publikoko Batzordearen irizpidea eztabaidatuko dute Osasuneko Lurralde arteko Kontseiluan, eta han berretsi beharko dute erabakia. Bertan parte hartuko dute Nafarroako Gobernuko eta Eusko Jaurlaritzako ordezkariek, besteak beste. Zenbait erkidegok eskatua dute adin muga guztiak ken dezatela, AstraZenecaren txertoa edonori jarri ahal izateko.
Nazioarteko ikerketa. Oxfordeko Unibertsitateak eta AstraZeneca enpresak sortutako txertoak %79ko eraginkortasun maila du COVID-19aren sintomak prebenitzeko, eta ospitalizazioa eragiten duten sintomarik larrienei aurre egiteko, berriz, %100eko babesa ematen du. Erresuma Batuko farmazia konpainia ondorio horretara iritsi da, AEBetan, Txilen eta Perun ikerketa bat egin ostean.
Zehazki, adin tarte guztietako 32.449 boluntariok parte hartu dute ikerketaren hirugarren fasean, eta, horietatik, 141 kasutan azaleratu ziren COVID-19aren sintoma arinak, eta inork ez zuen ondorio larririk pairatu. 65 urtetik gorakoen kasuan, gainera, txertoak %80ko babes maila eskaintzen duela nabarmendu du AstraZenecak.
