Bi bandera irabazi ditu asteburuan Ondarroako emakumezkoen traineruak
Zorrotzaurreko Uharteari I. Itzulian eta Portugaleteko San Nikolas IX. Traineru Jaitsieran azkarrenak izan dira. Duela urte bi uretaratutako traineruak denboraldi-aurrea bikain hasi dutela azpimarratu du Koldo Azpiazu Ondarroa Arraun Elkarteko presidenteak.
Ondarroako emakumezkoen traineruko arraunlariak, Portugaleteko banderagaz. Argazkia: Ondarroa Arraun Elkartea. Estropadaz estropada ibili dira azken egunetan arraunlariak. Traineruetan, esaterako, jokoan egon diren bi banderak irabazi ditu Ondarroako emakumezkoen traineruak. Duela urte bi uretaratutako traineruak garaipenak pilatzen jarraitzen du, eta ez edonola ere, nagusitasun osoagaz irabazi dituzte Zorrotzaurreko Uharteari I. Itzulia eta Portugaleteko San Nikolas IX. Traineru Jaitsiera.
Barikuan [martxoak 19] eskuratu zuten lehen bandera, Bilboko uretan. 23.37,21 denborarekin nagusitu ziren ondarrutarrak, eta bigarrenari (Deustu A) 22 segundoko abantaila atera zioten. Isuntzako emakumeek ere estropada ona egin zuten; hirugarren amaitu zuten proba (24.37,66).
Eguraldi oso txarra bazegoen ere, euriari eta haize bolada hotzei aurre egin eta estropada ona egin zuten ondarrutarrek. Lehen palakadetatik martxa ona hartu zuten, eta aurretik irten zuten Isuntza eta Deusto B mendean hartzeko gai izan ziren. “Hasiera bikaina egin zuten, eta gutxika aldea handitzen joan ziren. Aurretik irtenda zegoen Deusto B laster harrapatu zuten, eta Isuntzari ere helmugara ailegatu baino arinago aurrea hartu zieten”, azaldu du Koldo Azpiazu Ondarroa Arraun Elkarteko presidenteak.
Ondarroako emakumezkoen traineruko arraunlariak, banderagaz eskuetan. Argazkia: Ondarroa Arraun Elkartea.
Domekan [martxoak 21] lehiatu zen Portugaleteko Traineru Jaitsiera ere nagusitasun osoagaz irabazi zuen Antiguako Ama-ko emakumeen traineruak. 16.50,00 behar izan zuten proba amaitzeko, Lutxana bigarren sailkatuak baino 13,9 segundo gutxiago. Ondarrutarrek bizkor irten zuten hasieratik, eta erritmo horri eustea lortu zuten helmuga igaro arte. Denboraldi-aurrea bikain hasi dutela azpimarratu du presidenteak. “Taldeari motibaziorik ez zaio falta, baina denboradi-aurrean emaitza onak izateak lagundu egiten du datorren denboraldia motibazioz beteta hasteko”.
Gizonezkoen kategoria. Zorrotzaurreko Uharteari I. Itzulian bertoko gizonezkoen hainbat traineruk ere parte hartu zuten. Ondarroa izan zen bertoko ordezkarien artean azkarrena. “Gu baino talde sendoagoen aurretik helmugaratu ginen, eta hori oso garrantzitsua da guretzat”. Antiguako Ama-ko arraunlariek estropada bikaina egin zuen, eta hirugarren amaitu zuten sailkapenean (22.31,27), Zierbenaren (22.18,08) eta Santurtziren (22.19,04) atzetik, hurrenez hurren. Mutrikuk ere parte hartu zuen lehian; 10. postuan amaitu zuen (25.09,19).
Domekan, gainera, Oriaren 26. Traineru Jaitsiera ere jokatu zuten Ondarroako eta Mutrikuko gizonezkoek. Ondarroak 6. amaitu zuten (19.43.39) eta Mutrikuk 16. postua (20.49,15) eskuratu zuen. Gizonezkoetan Hondarribia izan zen azkarrena eta emakumezkoetan Donostia Arraun Lagunak.
