Ikasleek hezkuntza sistemaren "autoritarismoa" salatuko dute kalean
Mobilizazioak deitu dituzte martxoaren 25erako; Lea-Artibai mailan Ondarroan egingo dute manifestazioa. Pandemia garaian hezkuntza sistemaren arazo estrukturalak areagotu egin direla salatu nahi dute ikasleek.
Ikasleek protesta egingo dute martxoaren 25ean, hezkuntza sisteman “autoritarismoa” pairatzen dutela salatzeko. Ikasle Abertzaleek (IA) egin dute deialdia Lea-Artibain, eta 12:15ean Ondarroako Zaldupeko zubitik aterako den manifestazioan parte hartzera deitu dituzte ikasleak. Ikasleek beraien ikasketa prozesua kudeatzeko autonomia edukitzea, subjektu politiko bezala onartuak izatea eta kontrol sozialerako erabiltzen dituzten baliabide guztiak bertan behera uzteko eskatuko dute.
IAk salatu duenez, pandemia garaian hezkuntza sistemak aurretik zituen arazo estrukturalak areagotu dira, arazo sakonagoak bilakatuz. Hezkuntza kalitatearen beherakada nabarmena izan dela gaineratu du, eta ikasturte honetako ezinegona eta ezjakintasuna aipatu ditu: “COVID-19ak eragindako testuinguruan hezkuntza prozesuaren nolakotasunak ez dira argi geratu, eta hainbat neurri arbitrario hartu dituzte”.
Autoritarismoa hezkuntza kapitalistak berezkoa duen tresna dela dio IAk, eta ikasleak “infantilizatzen” dituela salatu du. “Ume modura tratatzen gaituzte gure bizitzen gaineko kontrola bermatuz, eta gure ikasketa prozesuaren gainean daukagun erabakimen gaitasun eza da horren adibide”, azpimarratu dute. Gaur egungo hezkuntza “diziplinatzeko prozesu hutsala” dela dio IAk, ebaluazio sistema edukiaren gainetik jarrita. “Kontrol soziala areagotu egin da, ikasle despolitizatu, diziplinatu eta otzanak bermatuz”.
Hain zuzen, pandemia garaian ikasleen askatasun politikoak urratu dituztela gaineratu du, ikastetxeetan lan politikoari oztopoak jarrita. Hori guzti hori dela eta, IAk azpimarratu du ikasleen batasuna ezinbestekoa dela.
