Sute batek kalte handiak eragin ditu Ondarroako Dongreneko eraikinean
Kalte materialak handiak izan badira ere, inor ez da zauritu. Suteak Dongre eraikineko egituran kalte nabarmenak eragin ditu, eta ziuraski, eraitsi egin beharko dute.
Suteak Dongreneko eraikinean eragindako kalteak. Argazkia: Ondarroako Udala. Sutea zapatu [martxoak 20] goizaldean piztu zen Ondarroako udal brigadak mantentze lanetarako erabiltzen duen makineria eta tresneria gordetzen dituen biltegian. Zehaztu dutenez, 02:00ak aldera piztu zen sua eta 03:30ak inguruan itzali zuten. “Suhiltzaileek nahikoa zailtasun eduki zuten eraikin barrura sartzerako orduan. Sarreran dagoen burdinezko atea zerra mekanikoagaz moztu behar izan zuten, eta horretarako bere denbora behar izan zuten. Bestelakoan, azkar itzali zuten sua”.
Suhiltzaileek ikerketa zabaldu dute sutea zerk eragin zuen argitzeko, baina, antza denez, argindarragaz izandako arazoren batek piztu zuen sua. “Oraindik ez dago seguru sutea zerk eragin zuen, baina eskuartean darabilgun hipotesi nagusia da zirkuitulabur batek eraginda hastea”.
Biltegia erabat kiskalita geratu da eta lokalean zeuden hainbat ibilgailu, makina eta tresneria ere erreta daude. “Kaleak garbitzeko makina guztiz kiskali da, eta ez dago erabilgarri. Belarra mozteko eta inausketak egiteko erabiltzen den beste hainbat tresneria ere ezingo da erabili; kalte handiak jasan dituzte eta. Gainontzeko ibilgailu eta makinak kedarrez beteta geratu ziren, eta kalteek handiago baziruditen ere, konponketa batzuk eginda erabilgarri egongo direla uste dugu”. Berreskuratu daitezkeen ibilgailuak eta makineraria garbitzen hasita daude udal langileak.
Brigadak erabiltzen duen makinaria erabat kiskalita. Argazkia: Ondarroako Udala.
Suteak, aldiz, beheko solairuetan entsegatzen zuten musika taldeen lokaletan ez du aparteko kalterik eragin. Hala ere, lokalak hustu behar izan dituzte. “Musikari gehienek atera dituzte euren musika tresnak. Eraikina Udaltzaingoak zigilatuta geratu da, segurtasunagatik. Norbaitek beheko lokaletatik zerbait atera behar baldin badu Udaltzaingoagaz jarri beharko da harremanetan”.
Kalte materialak handiak izan badira ere, inor ez da zauritu. Dongre zerrategia zegoen eraikina etxeetatik aldenduta dago, eta, suak, beraz, ez zuen herriko bizilagunik arriskuan ipini. Hori bai, suteak egituran kalte nabarmenak eragin ditu, eta ziurrenik, eraitsi egin beharko dute. “Aitor Jauregi udal arkitektoak egin duen behin-behineko txostenak dioenaren arabera, eraikina ez dago erabilgarri. Ez dago eraikina berehala jausteko arriskurik, baina egiturak kalte nabarmenak ditu: habe batzuk zer edo zer mugituta eta zabalduta daude eta horma batzuk ere konkortuta daude. Peritua eraikina zer egoeratan dagoen ikuskatzera dator, eta haren behin-betiko txostenaren zain gaude”.
Brigadarentzako lokal berri baten bila ari da orain momentuan udala. “Udalak brigada beste nonbaiten birkokatzeko asmoagaz zebilen aspalditik, baina orain lokala bilatzeko kudeaketa lanak arindu egin beharko ditugu nahitaez”. Aldagelak behin-behinean Zaldupe udal futbol zelaian ipiniko dituzte. “Han dauden etxolak baliatuko dira horretarako. Kaleak garbitzeko eta belarra mozteko materiala ez dago erabakita non lagako den, baina ziuraski futbol zelaiaren eremuan gordeko da behin-behinean”.
Kaleak garbitzeko makina, kiskalita. Argazkia: Ondarroako Udala.
