Pedro Alkorta 'Doistu' zendu da, Euskadiko Herri Kirol Federazioko presidente ohia
Zapatuan [martxoak 27] omenaldi xumea egingo diote Saturraranen, Mutriku Sokatira Taldearen egoitzaren aurrean.
Pedro Alkorta 'Doistu' artxiboko irudian. HITZAk jakin ahal izan duenez, mutrikuarra eguazten [martxoak 24] iluntzean hil zen, 71 urterekin; hilbeila Mutrikuko beilatokian egongo da, barikuan [martxoak 26] 11:00etatik 14:00etara eta 17:00etatik 20:00etara. Zapatuan [martxoak 27] 72 urte beteko zituen Pedro Alkorta Txurruka Doistu-k, eta horren harira, omenaldi xume bat egingo diote Saturraranen. Ekitaldia 17:30ean hasiko da, Mutriku Sokatira Taldearen egoitzaren aurrean. “Sebastian Lizaso bertsolaria etorriko da, eta ziuraski, sokatiran eta trontzan ere egingo dute”, azaldu du Jose Mari Lejardi Gabixola ekitaldiaren aurkezleak.
Haren hurrekoek azpimarratu dutenez, herri kirolen munduan pertsona “nabarmena” izan zen. “Kirolari amorratua izan zen, geldiezina”. Herri kirolak odolean zeramatzan, Pedro Mari Txurruka Aritza harrijasotzaile ezagunaren biloba zen. 2006ko otsailetik 2013ko otsailera, esaterako, Euskadiko Herri Kirol Federazioko presidentea izan zen. Bi agintalditan izan zen erakundeko presidentea; aurretik ere zuzendaritza taldeko kidea ere izan zen.
Sokatiran ez eze, trontzan eta arraunean ere ibilbide aparta osatu zuen
Mutriku Sokatira Taldearen sortzaileetako bat ere izan zen; Mijoa auzoko beste hainbatekin batera, aparteko lana egin zuen sokatira bultzatzeko. 1972an sortu zuten taldea, Markina-Xemeinen lehiatu zen 720 kiloko Espainiako txapelketan parte hartzeko; txapelketa irabazi egin zuten. Mutriku Sokatira Taldean ibilbide oparoa osatu zuen Alkortak. Plazarik plaza hainbat txapel pilatu zituen taldeak, eta nazioarteko txapelketetan parte hartzeko aukera ere eduki zuten.
Tiratzeari utzi ondoren ere, herriko sokatira taldearen ibilbidea hurbiletik jarraitu zuen; besteak beste, emakume eta gizonezkoen taldea ere entrenatu zituen. Herri kirol mundua barru-barrutik bizitzeko aukera izan zuen. Tartean, epaile lanetan ere aritu zen. Sokatiran ez ezik, trontzan ere ibilbide aparta osatu zuen Jose Mari Egaña Ilunbe-rekin batera. Arraunean ere urte asko egin zituen. “Sokatiran zebiltzan hiru auzotarrek trainerilletan hainbat bandera irabazi zituzten, tartean, Espainiako Txapelketa ere irabazi zuten Ondarroako taldearekin”.
Maila pertsonalean mekanikoa zen. Azken urteetan, itsasontzien mekanikoa izan zen, jubilatu zen arte. Mutrikun ezker abertzaleko zinegotzia ere izan zen; Herri Batasuneko zinegotzia izan zen bi agintalditan, 1987tik 1995ra. San Jeronimo auzoko jaietan ere ibiltzen zen antolaketa lanetan.
