22. Korrika 2022ko martxoaren 31tik apirilaren 10era egingo da
Aurten Korrikarik egin ez bada ere, ez dela bertan behera geratu azpimarratu dute antolatzaileek. Gaineratu dutenez, 22. Korrika "inoiz baino beharrezkoagoa" izango da.
'Bultza euskaltegiak! Bultza euskara!' ekitaldia, Etxebarrian. Argazkia: Korrika. Korrikaren antolatzaileak etorkizunera begira jarrita daude, eta iragarri dute euskararen aldeko lasterketa erraldoia 2022ko udaberrian berriro herriz herri igaroko dela. Zehaztu dutenez, 2022ko martxoaren 31tik apirilaren 10era egingo da 22. Korrika. Bultza euskaltegiak! Bultza euskara! dinamikaren baitan domekan [martxoak 28] egindako ekitaldietan egin zuten iragarpena.
Aurten Korrikarik egin ez bada ere, ez dela bertan behera geratu azpimarratu dute. “Korrika atzeratu dugu, baina ez dugu bertan behera utzi; eta, gainera, azpimarratu behar dugu oraindik ere nahitaezkoa dela duela 40 urte jaio zen ideia ero eta zoragarri hura gauzatzea”.
Gaineratu dutenez, 22. Korrika “inoiz baino beharrezkoagoa” izango da. “AEKn hobetsi dugu Korrika bezalako ekimena atzeratzea, besteak beste, pandemiaren barruko transmisioa ahalik eta gehien murrizteko. Korrikaren atzerapenak hutsunea sortuko du, baina Korrika bera horren garrantzitsua izanik, beharrezkoagoa da Korrika denok desiratzen ditugun baldintza hobeetan egitea. Ondo bidean, eta egoera hobetzen bada, denok desiratzen dugun Korrikara iritsiko gara, 2022. urteko udaberrian”.
Euskalduntze mugimenduaren garrantzia plazaratzeko ekintzak egin dituzte eskualdean
Domeka eguerdian, bestalde, 22. Korrikak amaitu beharko lukeen une berean, Korrikaren hutsunea betetzeko ordu erdi inguruko ekitaldi xumeak egin zituzten Euskal Herriko hainbat plazatan. Euskararen lekukoa kalera atera eta Bultza euskaltegiak! Bultza euskara! aldarrikatzeko ekintzak Aulestin, Etxebarrian, Lekeition, Markina-Xemeinen, Munitibarren, Ondarroan eta Ziortza-Bolibarren ere egin zituzten. Dozenaka herritar batu ziren aldi berean euskalduntze mugimenduaren garrantzia plazaratzeko.
Herri bakoitzak bere programa osatu zuen. AEKren mezua irakurketa egin zuten herri guztietan, eta horma-irudiak eta graffitiak osatu edota talde argazkiak atera zituzten herririk herri egindako ekitaldietan. Oskorriren Euskal Herian euskaraz kantu ezaguna ere abestu zuten.
