Dragak Mutrikun egin duen hondar isurketa salatzeko protesta jendetsua egin dute
100 bat jolasontzik parte hartu du Alkolea-Intxirri elkarteak deitutako protesta zaratatsuan. Herritarren kezka aintzat hartzea espero dute.
Dragaren aurkako protesta Mutrikun. Argazkia: Alberto Gorritiberea. Zumaiako itsasadarrean jaso eta Mutrikuko portuko kanpoko bokalean hustu dituzten hondarrek hautsak harrotu dituzte Mutrikuko herritarren artean. Zumaiako Balentziaga ontziolan eraikitako Tarajop ontzia martitzenean [martxoak 30] itsasoratzeko Urolako itsasadarra dragatzen aritu da egunotan, eta Dragasub dragak herrian egin dituen isurketek kezka eta ezinegon handia eragin ditu.
Herrian eta herritarren artean dagoen kezka aintzat hartzeko asmoarekin, isurkertak salatzeko protesta deitu zuen Alkolea-Intxirri jolasontzien elkarteak. Domeka [martxoak 28] eguerdian egindako protestan parte hartu zuten 100 bat ontzi turuta jotzen aritu ziren moila inguruetan eta itsasertzean batu ziren beste hainbatek ere bat egin zuten protestarekin.
Jaurlaritzako kezkatzeko arrazoirik ez dagoela adierazi dio Mutrikuko Udalari
Alkolea-Intxirri elkarteko kideek nabarmendu dutenez, Zumaiako itsasadarra dragatu behar den bakoitzean Mutrikuko bokalea ez dute nahi etengabeko isurketa gune bihurtzea. Elkarteko ordezkarien iritziz, isurketak segurtasun arazoak sortzen ditu; botatako hondarrek sakonera jaisten dutela diote, eta ondorioz, olatuak errazago hausten direla. Isurketek osasun arazoak eragin ditzazketela ere uste dute; esan dutenez, joan den abuztuan isurketak egon zirenean hainbat bainularik begietako eta azaleko arazoak eduki zituzten.
Joseba Palenzuela alkateak egueneko [martxoak 25] osoko bilkuran agertu zuenez, Jaurlaritzako Portu eta Itsas Gaietarako Zuzendaritzara bidalitako kexa formalaren erantzuna jaso dute. “Kezkatzeko arrazoirik ez dagoela adierazi digute. Ekartzen ari diren hondarra hondar garbia dela diote; Aztik egindako jarraipena eta azterketak hala diotela, eta beraien aldetik ez dutela zalantzarik horretan”.
Dragak bidaia bakoitzean garraiatu dituen 3.000 metro kubikoek “itsasoz sartzeko segurtasunari” ez diotela eragiten erantzun dietela ere gaineratu zuen. “Olatua apurtzeko erari dagokionez, lasai egoteko esan digute. Eurek egindako neurketen arabera, horko hondoa ondo dagoela eta ekartzen ari hondarrak ez duela eragiten bermatzen dutela esan digute”.
