Asier Badiola preso ondarrutarra El Duesoko kartzelan dago
Senideek HITZAri jakitera eman diotenez, eguen [apirilak 8] goizaldean atera zuten Valentziako espetxetik. Bariku [apirilak 9] goizean heldu zen Santoñakora, gaua Zaragozako espetxean igaro ostean.
Picassenteko espetxean (Valentzia, Herrialde Katalanak) zegoen Asier Badiola Lasarte Indixu preso ondarrutarra El Duesoko (Kantabria, Espainia) kartzelan dago, etxetik 120 bat kilometrora. Espainiako Espetxe Erankundeek martxoaren 12an eman zuten lekualdatzearen berri eta lau aste geroago hurreratu dute, COVID-19agaz lotutako osasun egoerak ahalbidetu duenean. “Osasun egoera eta tartean ere opor egunak egon direla kontuan hartuta, pentsatzen genuen denbora tartean lekualdatu dute”, azaldu du Iñigo Badiola Asierren anaiak.
Badiolaren senitartekoek azaldu dutenez, eguenean [apirilak 8] 06:00ak aldera atera zuten Valentziako kartzelatik. “Bariku [apirilak 9] arraltsaldean ondo dagoela esateko deitu zuen telefonoz; gaur [apirilak 12] arte ez du dei gehiago egiteko aukerarik eduki. Dirudienez Daroca-ko espetxean (Zaragoza, Espainia) egin zuen gaua eta bariku goizean ailegatu zen Santoñako kartzelara”.
Asteburuan ez du senide eta lagunekin bisitarik egiteko aukerarik ez eduki. “Bisitak egiteko ordu guztiak hartuta zeudenez, ezin izan dugu bisitarik egin. Aste honetan bisitak egiteko aukera edukiko du, ziurrenik eguaztenean [apirilak 14] jasoko du lehenengoa”.
Preso ondarrutarrari gainera, espetxez lekualdatzeaz gain, bigarren gradura pasatzea ere onartu diote. Orain arte lehen graduan egon da, neurriak zer edo zer arinduta. Graduz aldatuta, goiz eta arratsaldez patiora irteteko eta bestelako ekintzetan parte hartzeko aukera edukiko du.
