Julen Goikoetxea ondarrutarra gogoratu dute Itzulian
Deuceunick taldeko Mikkel Honorek irabazi du Ondarroan amaitu den 5. etapa. Hemen etapaz etapa Ander Okamika txirrindulari lekeitiarrak (Burgos taldea) eta Txomin Juaristi markina-xemeindarrak (Euskaltel Euskadi) egindako denbora.
Itzuliaren azken etaparen hasiera. Argazkian: Julen Goikoetxearen senideak, Aurrera Kirol Elkarteko eta udal ordezkariekin batera. Argazkia: Ondarroako Udala. Zapatuan [apirilak 10] Ondarroan hasi zen Itzuliaren azken etaparen irteera oso berezia izan zen. Unerik hunkigarriena Zaldupeko irteerako zinta mozteagaz ailegatu zen. Izan ere, Julen Goikoetxea Garate txirrindulari ondarrutarraren etxekoak arduratu ziren zinta mozteagaz, eta eurekin batera egon ziren Aurrera Kirol Elkarteko eta Ondarroako Udaleko ordezkariak. “Julen eta bidean utzi gaituzten txirrindulari guztiak” omendu nahi izan zituzten keinu horregaz.
Etapa hasierak bestelakorik ere ekarri zuen. Eladino Gonzalez Aurrera Kirol Elkarteko presidenteak, esaterako, oroigarri berezia eman zion aurten txirrindularitza lagako duen Alejandro Valverderi. Aurreraren mendeurreneko kamiseta berezia oparitu zioten.
Itzuliko azken etapari dagokionez, bizia, laburra eta lehergarria izan zen. Ondarroan hasi eta Arrateko gainera iritsi bitartean 112 kilometroko ibilbideari aurre egin behar zioten txirrindulariek. Etapa motza izan bazen ere, zazpi mendate gainditu behar izan zituzten. Ibilbidea osatzen azkarrena David Gaudu frantziarra izan zen.
Itzuliaren etapa amaiera Ondarroan. Argazkia: Jose Mari Urrosolo.
Bezperan jokatu zen 5. etapa, ostera, Hondarribian hasi eta Ondarroan amaitu zen. 160 kilometroko etapan Deuceunick taldeko Mikkel Honore nagusitu zen. Danimarkarra ihes eginda ailegatu zen helmugara, Josef Cerny taldekideagaz batera. 10. kilometroan ihes egin zuten zuten biek, eta tropelak azken kilometroetan erritmoa azkartu bazuen ere, ezin zituzten iheslariak harrapatu.
Eskualdeko bi txirrindularik ere parte hartu dute lehian. Txomin Juaristi markina-xemeindarrak eta Ander Okamika lekeitiarrak oso gorabeheratsua izan den Itzulia amaitzea lortu dute. Euskaltel-Euskadi taldeko markina-xemeindarrak 74. postuan amaitu du, Primoz Roglic irabazlearengandik 44 minutu eta 25 segundora. Burgos-BH taldeko lekeitiarrak, ostera, 97. postuan amaitu du, irabazlearengandik 1 ordu 1 minutu eta 5 segundora.
Juaristik azken etapan lortu zuen posturik onena; 29. amaitu zuen Ondarroa eta Arrate batu zituen etapa. Okamikak, aldiz, 2. etapan lortu zuen sailkapeneko emaitzarik onena. 90. postuan amaitu zuen.
Etapetan egindako denborak:
- etapa: Bilbo-Bilbo erlojupekoa.
- Txomin Juaristi. 103. postua, irabazlearengandik 1 minutu eta 45 segundora.
- Ander Okamika. 152. postua, irabazlearengandik 2 minutu eta 22 segundora.
- etapa: Zalla-Sestao.
- Txomin Juaristi. 44. postua, irabazlearengandik 1 minutu eta 21 segundora.
- Ander Okamika. 90. postua, irabazlearengandik 4 minutu eta 27 segundora.
- etapa: Amurrio-Ermualde
- Txomin Juaristi. 46. postua, irabazlearengandik 3 minutura.
- Ander Okamika. 99. postua, irabazlearengandik 8 minutu eta 14 segundora.
- etapa: Gasteiz-Hondarribia.
- Txomin Juaristi. 143. postua, irabazlearengandik 20 minutu eta 45 segundora.
- Ander Okamika. 147. postua, irabazlearengandik 20 minutu eta 46 segundora.
- etapa: Hondarribia-Ondarroa.
- Txomin Juaristi. 134. postua, irabazlearengandik 6 minutu eta 50 segundora.
- Ander Okamika. 135. postua, irabazlearengandik 6 minutu eta 50 segundora.
- etapa: Ondarroa-Arrate.
- Txomin Juaristi. 29. postua, irabazlearengandik 11 minutu eta 57 segundora.
- Ander Okamika. 103. postua, irabazlearengandik 19 minutu eta 40 segundora.
