Osakidetzak ezingo ditu jaso Janssen txertoak
AEBtan txerto hori jaso dutenen artean odolbilduak izan dituzten sei kasu erregistratu dituzte. Diotenez kasu «arraro eta larriak» izan dira guztiak, eta geraldi bat egitea komeni dela esan dute.
Osakidetzak gaur [apirilak 14] jaso behar zituen Janssen txertoaren lehen 6.850 dosiak, eta 70-79 arteko pertsonei jartzea zen asmoa, baina, oraingoz, ez dute txerto hori banatuko Europako Batasunean, eta Espainiako Osasun Ministerioak ere esan dio Osakidetzari txertoak jasotzeko plana bertan behera geratuko dela.
Albistea AEBetan sortu zen atzo [apirilak 13]. CDC erakundeak eta botiken gaineko kontrola daraman FDAk eskatu dute txerto hori ez jartzeko. Adierazi zuten txertoa jarri ostean odolbilduak izan dituzten sei pertsonaren berri eduki zutela, kasu «arraro eta larriak» izan direla guztiak, eta geraldi bat egitea komeni dela horregatik. Dagoeneko zazpi milioi pertsonari jarri diete txerto hori AEBetan. Zabaldu den informazioaren arabera, odolbildu kasu «arraro» guztiak andrazkoetan atzeman dituzte; 18 eta 48 urte artean dituzte, eta bat hil egin da.
FDAk adierazi du «segurtasunak» izan behar duela txertatzearen ardatzetako bat eta AEBetako Gobernuak oso serio hartzen dituela txertoa hartu ostean agertzen diren osasun arazoen gaineko ohartarazpenak. Aditzera eman dutenez, odolbilduen gaineko abisurik ez da agertzen txertoak eragin ditzakeen arriskuei buruzko argibideetan, eta azterketa sakon bat egitea komeni da.
Johnson & Johnson konpainiaren txertoa da Janssen, eta ezaugarri nabarmenenetariko bat du txertoaren dosi bakar bat aski dela immunizazioa lortzeko. Adituek diote txertatze prozesuak bizkortze aldera erabakigarria izan daitekeela.
