Saturrarango kartzelan preso egondakoak gogoratu dituzte
Lore eskaintza eta minutu bateko isilunea egin dituzte Nestor Basterretxeak egindako oroigarriaren parean, kartzelan preso egon ziren emakume eta haurren omenez.
Berdeak+Independenteak koalizioko kide bat gaur eguerdian lore eskaintza egiten, Nestor Basterretxeak egindako oroigarriaren aurrean. Gaur [apirilak 14] 90 urte bete dira Espainiako II. Errepublika aldarrikatu zutela, eta egun horren harira, ekimen xumea egin dute Saturraranen. 1938 eta 1944 urteen artean bertan egon zen kartzelan 16 eta 80 urte bitarteko 4.000 emakumetik gora egon ziren preso, gehienak ere errepublikarrak. 177 heriotza zenbatu zituzten, horietatik hirurogei inguru 0 eta 3 urte bitarteko haurrak; adopzioan emandako ehun haur inguru ere desagertu ziren. Saturrarango kartzelan gertatutakoa “ahaztu eta errepikatu ez dadin” ekintza sinbolikoa egin dute kartzela zegoen tokian.
Saturraranen gertatutakoa memoria historikoaren ikuspuntutik aldarrikatzeko nahiarekin antolatu dute ekintza Berdeak+Independenteak koalizioko kideek. Errepublikar bandera jarri dute Nestor Basterretxeak egindako oroigarrian eta, ondoren, lore eskaintza eta minutu bateko isilunea egin dituzte kartzelan preso egon zirenen omenez. Ekitaldiari amaiera emateko Internazionala eta Saturraran 1938-1944 kantuak ipini dituzte.
B+I koalizioko kideak omenaldian parte hartu dute bi herritar anonimorekin batera.
