Poltsa konpostagarrien erabilera desegokia atzeman dute Debabarrenan
Poltsa konpostagarriak edukiontzi hori eta grisetan bilatu dituztela esan dute. Gaineratu dute aurreko urteekin alderatuta, poltsen kontsumoan %20ko gorakada erregistratu dutela aurtengo lehen hiru hilabeteetan.
Debabarreneko Mankomunitateak esan duenez azkenaldian poltsa konpostagarrien erabilera desegokia atzeman dute; poltsa konpostagarriak edukiontzi hori eta grisetan aurkitu dituztela esan dute. Eta gaineratu dute poltsa konpostagarrien kontsumoa %20 igo dela, eta erabilera desegokiak gorakada horretan eragiten duela.
Azaldu dutenez, 2019an eta 2020an eskualde osoan batazbeste 7.500 poltsa sorta kontsumitzen ziren hilero, eta aurten, lehen hiru hilabeteetan hilero 9.000 sorta kontsumitu direla esan dute (%20ko gorakada). “Mankomunitateak urtero 110.000 euro baino gehiago inbertitzen ditu poltsa konpostagarrietan, eta erabilera desegokiak horretan ere eragiten du”.
Poltsa sorta bakoitzak 37 poltsa ditu, eta erabiltzaile bakoitzak lau astetik behin hartu ahal du sorta bat. “Horrek esan nahi du bizikidetza unitate bakoitzak eguneko poltsa bat baino gehiago duela hondakin organikoetarako. Ikuspuntu teknikotik kopuru hori nahikoa da”.
Horren guztiaren aurrean, Mankomunitateak poltsa konpostagarrien erabilera arduratsua egiteko mezua zabaldu du. “Poltsa konpostagarriak soilik hondakin organikoak edukiontzi marroira botatzeko erabili behar dira. Erabilera egoki hori funtsezkoa da mankomunitateak poltsak doan ematen jarraitu ahal izateko”.
