Amaia Antxustegi Lekeitioko Udaleko EAJko zinegotziak karguari uko egin dio, ofizialki
Joan den barikuko [apirilak 16] osoko bilkuran eman zuen jakitera bere erabakia. Bere ordezkoa izendatzeko prozedimendua hasiko dute orain.
Amaia Antxustegi zinegotzia Lekeitio Lagunkoia Ekintza Planaren nondik norakoak azaltzen. Argazkia: Lekeitioko Udala Amaia Antxustegi Ziarda Lekeitioko Udaleko zinegotziak uko egin zion ofizialki bere karguari joan den bariku [apirilak 16] arratsaldean Lekeitioko udaletxean egin zen osoko bilkuran. Eta, orain, bere ordezkoa izendatzeko prozedura hasiko da. Horrela, erabakiaren berri emango zaio Madrilgo Hauteskunde Batzorde Zentralari, eta zinegotzi berria izendatzeko bideari ekingo diote.
Lekeitioko Udalak jakitera eman duenez, Hauteskunde Batzordearen jakinarazpena jaso ondoren, zerrendaren ordena errespetatuz, interesdunari agiria jaso duela jakinaraziko diote. Ostean, Udalbatzak, dagokion zin egitea egingo du eta zinegotzi berriaren kargu hartzea onartuko du.
Amaia Antxustegi Ziarda zinegotzia Lekeitioko Udaleko Gizarte Politikak, Emakumea eta Berdintasuna eta Herritarrekin Harremanak, Udal Barne Antolamendua eta Giza Baliabideak udal sailetako arduraduna izan da, eta gainera, alkateordearen kargua ere burutu du orain arte.
Prozedurak aste batzuk iraungo dituela azaldu dute udaletik, eta beraz, hurrengo asteetan jakinaraziko dute bere kargua nork hartuko duen.
Bizkaiko Foru Aldundiko ahalduna da gaur egun, Amaia Antxustegi Ziarda lekeitiarra. Martxoaren 16an eman zuen Bizkaiko Foru Aldundiaren gobernu aldaketaren berri Unai Rementeria Maiz ahaldun nagusiak, Gobernu Kontseiluaren ostean, eta martxoaren 17an hartu zuen Antxustegik Iraunkortasun eta Ingurumen Naturaleko diputatu kargua.
