Isuntzakoak zilarrezko eta brontzezko dominekin bueltatu dira Euskadiko Batel Txapelketatik
Lekeitioko arraun taldeko kadete mailako neskek zilarrezko domina irabazi dute, eta ume mailako mutilek brontzezkoa. Ondarroako umeen mailako nesken taldea laugarren sailkatu da.
Argazkia: Isuntza. Bizkaiko Batel Txapelketa irabazi ostean, Isuntzako kadete mailako neskak txapeldunorde geratu dira Euskadiko Batel Txapelketan. Zapatu arratsaldean lehiatu zituzten sailkatze estropadak, eta atzo goizean finalak. Lekeitioko arraun taldekoak bi podiumetan sartu ziren. Nesken kadete taldekoen lorpenaz gain, ume mailako mutilek brontzezko domina irabazi zuten. Nesken gazte taldea, berriz, laugarren geratu zen.
Ondarroatik, berriz, umeen mailako nesken taldeak lortu zuen atzoko finaletan sartzea, eta laugarren sailkatu da.
Argazkia: Ondarroa AE.
Kadete mailakoen emakumezkoen taldeen artean San Juanek eroan zuen bandera, estropada zazpi minutu, 26 segundo eta 53 ehunenetan amaituta. Bost segundo eta hamazazpi ehuneneko aldea atera zieten Isuntzako arraunlariei, eta tolosarrak sailkatu ziren hirugarren postuan.
Mutilen umeen mailan Tolosa izan zen txapelduna, eta Oriok eta Isuntzak osatu zuten podiuma. 04:41.27 denbora egin zuen lehenengoak. Sei segundo eta hemeretzi ehunenera sailkatu zen Orio, eta hamasei segundo eta 80 ehunenera Isuntza.
Gazte mailako emakumezkoen finalean, Kaiku izan zen azkarrena: 10:02.32, eta bost segundo eta 93 ehunenera sailkatuta, Orio geratu zen txapeldunorde. Isuntza gutxigatik geratu zen podiumetik kanpo. 10:13.24 egin zuen Deusto hirugarrenak eta 10:14.90 talde lekeitiarrak.
Bestalde, ume mailako nesken artean, San Juanek lortu zuen bandera (05:01.85). Zumaia eta Hernani sailkatu ziren bigarren eta hirugarren, hurrenez hurren. Ondarroa irabazlearengandik hamahiru segundo eta hamabost ehunenera sailkatu zen.
