Lea-Artibaiko hiru bikote Bizkaiko finalean
Lemoako bikoteari 22-17 irabazita finalerako sailkatzea lortu du Markina-Xemeingo Esku Pilota taldeko gizonezko nagusien berezi mailako bikotea. Lea Ibarra Motrolloko emakume nagusien mailako bi bikote ere finalean daude.
Agirreamalloa eta Ibarloza Galdakaon jokatu zuten Bizkaiko Txapelketako finalaurrekoan. Argazkia: Markina-Xemeingo Esku Pilota Taldea Bizkaiko Esku Pilota Txapelketaren finalerako sailkatu dira Markina-Xemeingo Esku Pilota Taldeko gizonezko nagusiak. Joan den barikuan [apirilak 16] Galdakaon jokatutako finalaurrekoa 22-17 irabazi zuten Agirreamalloak eta Ibarlozak, eta kanporaketaren amaierara arte ailegatu dira. Nagusien mailako berezi taldean, gorenean, jokatzen ari da bikotea, eta maila handia erakusten ari dira, partidak nagusitasunez irabaziz.
Lemoa izan zuten aurkari joan den barikuan, eta bere kontra ere ondo moldatu ziren Markina-Xemeingo taldekoak. “Goreneko mailan aurrean ibiltzeko bikote oso ona izan behar da, eta maila hori erakusten ari dira Agirreamalloa eta Ibarloza”, adierazi du Pello Urionabarrenetxea Markina-Xemeingo Esku Pilota Taldeko entrenatzaileak. Momentu honetan, hala ere, Ibarlozak eskua minduta daukala aitatu du eta sorbaldan ere baduela arazoren bat. “Duela hilabete sasoi hobeagoan zegoen, baina ahalegin guztia jarriko dute finalerako”.
Bizkaiko finala barikuan [apirilak 23] jokatuko dute Markina-Xemeingo Esku Pilota Taldeko gizonezko nagusiek, 19:00etan, Galdakaon, eta Galdakaoko bikotea izango dute aurkari.
Lea Ibarra Motrollo taldeko emakume nagusien mailako bikoteak ere fin ibili dira txapelketan. Lau bikotek parte hartu dute Bizkaiko norgehiagokan eta euretatik bi finalean egongo dira: Martin eta Aldai eta Anitua eta Beitia. Elkarren aurka ariko dira biak finalean, beraz, txapela etxean geratuko dela ziur dago.
Finala Usansolon jokatuko dute Lea Ibarra Motrolloko emakume nagusiek, zapatuan [apirilak 24]. Partidak 18:00etan hasiko dira, eta bigarrena izango da Martin eta Aldai eta Anitua eta Beitiaren artekoa.
Kanpoan. Finaletik kanpo geratu dira ordea, Markina-Xemeingo Esku Pilota Taldeko kadeteak eta Lea Ibarra Motrollo taldeko mutil gazteak eta emakume nagusien bikote bat ere. Asteburuan jokatu diren finalaurrekoetan 22-11 galdu zuten Leako gazteek eta 22-16 emakume nagusiek, Markina-Xemeingo bikoteek 22-6 eta 22-20 galdu zuten Lezama eta Lagun Onak taldeen aurka.
