Mutriku gune gorriko herrien zerrendan sartu da, eta Berriatua eta Markina-Xemein irten egin dira
Azken hiru egunetan 25 positibo kasu erregistratu dituzte Lea-Artibai eta Mutrikun: 11 kasu Ondarroan erregistratu dituzte, 6 Mutrikun, 6 Lekeition eta 2 Markina-Xemeinen. Ondarroak gune gorriko zerrendan egoten jarraitzen du. Bizkaia ere gune gorrian sartu da eta, ondorioz, bihartik aurrera perimetralki itxita geratuko da; hiru lurraldeak daude gune gorrian.
Eusko Jaurlaritzak gaur [apirilak 19] argitaratu duen txostenaren arabera, Ondarroak gune gorriko herrien zerrendan egoten jarraitzen du; nahiz eta barikutik domekara [apirilaren 16tik 18ra] herri horretako intzidentzia tasa 117 puntu jaitsi den, oraindik orain 875,45ko tasa dauka. Eta aurreikuspenak beteaz, gune gorriko herrien zerrendara gehitu da Mutriku. Markina-Xemein eta Berriatua, aldiz, gune gorrian dauden zerrenda horretatik atera dira.
Dena dela, Markina-Xemeingo intzidentzia tasa 20 puntu igo da barikutik domekara bitartean. Baina oraindik ere 400 azpiko tasari eusten jarraitzen dio. Lekeitioko tasa ere zer edo zer igo da, azken egunetan kasuak erregistratu dituztelako; 207,56ko tasa dauka.
Oro har, barikutik domekara [apirilaren 16tik 18ra] 25 kasu erregistratu dituzte: 11 kasu Ondarroan erregistratu dituzte, 6 Mutrikun, 6 Lekeition eta 2 Markina-Xemeinen.
Joan den aste osoan [apirilaren 12tik 18ra] 66 kasu erregistratu zituzten Lea-Artibai eta Mutrikun: 38 kasu Ondarroan erregistratu zituzten, 17 Mutrikun, 7 Lekeition, 3 Markina-Xemeinen eta 1 Munitibarren. Duela bi aste atzemandako kasuekin alderatuta, joan den astean 12 kasu gutxiago erregistratu zituzten, eta duela hiru aste baino 11 gutxiago.
Hiru lurraldeak, gorrian. Arabak 437,90eko tasa dauka (+3 puntu), Bizkaiak 419,13koa (+24 puntu) eta Gipuzkoak 635,71koa (+54 puntu).
Herriz herriko intzidentzia tasa (eguneratuta):
- Amoroto: 722,89 (241 puntu jaitsi da)
- Aulesti: 0
- Berriatua: 318,22 (ia 80 puntu jaitsi da)
- Etxebarria: 0
- Gizaburuaga: 1.000
- Ispaster: 0 (barikuan 134,41ko tasa zeukan)
- Lekeitio: 207,56 (41 puntu igo da)
- Markina-Xemein: 318,41 (20 puntu igo da)
- Mendexa: 0
- Munitibar: 218,34
- Mutriku: 451,64 (ia 20 puntu igo da)
- Ondarroa: 875,45 (117 puntu jaitsi da)
- Ziortza-Bolibar: 0
