Yolanda Larreategi markina-xemeindarrak jaso du 39. Lizardi Saria
Sari banaketa ekitaldia domekan [apirilak 18] egin zen, Zarautzen. Larreategik irakurtzearen eta idaztearen garrantzia azpimarratu zuen saria jasotzerakoan: "Txikitatik landu behar dugun zerbait da".
Yolanda Larreategi, erdian, Yolanda Arrieta sariketako epaimahaiko kideagaz eta Mariasun Landa I. Lizardi Saria irabazi zuen herritarragaz. Argazkia: Dorleta Agiriano Lai (Zarauzko Hitza) Markina-xemeindarrak Ur eta lur ipuinagatik jaso du literatur saria Zarautzen egindako sari banaketa ekitaldian. Saria jasotzerakoan, Larreategik esan du beretzako “ohorea” dela saritua izatea eta “apaltasunez jaso” duela saria, baina baita “harrotasun handiz” ere bere “bihotzean”. Larreategik 1982an I. Lizardi Sariketa irabazi zuen Mariasun Landaren eskutik jaso zuen saria, eta aldamenean eduki zuen, besteak beste, Yolanda Arrieta idazle etxebarritarra. Izan ere, azken hori epaimahaiko kideetako bat izan da.
Xabier Lizardik 125 urte beteko zituen egunean egin zuten haren izena daraman literatura lehiaketako sari banaketa ekitaldia, Zarautzen. “Irakurtzearen eta idaztearen garrantziaz” hitz egin zuen Larreategik saria jasotzerakoan. “Irakurtzea eta idaztea ez dira denbora-pasa soil bat. Sentimenduak eta balioak lantzen ditugu; ez soilik haurrengan eta gazteengan; txikitatik landu behar dugun zerbait da”. Balio horien artean aipatu zituen “enpatia”, “afektibitatea” eta “ongizatea”.
Idazteari dagokionez, ondorioztatu du “idazten ez dena ez duela gero inork irakurtzen” eta ezagutzen, eta “airean desegiten den burbuila bat” bilakatzen dela idazten eta azalera ateratzen ez den barne-mundu oro. Hala, idaztera dei egin zuen Larreategik, baita irakurtzera ere: “Irakurtzean bizitza hartzen duzu, eta idaztean bizitza ematen duzu. Biak daude lotuta, eta biak dira garrantzitsuak”.
Narrazioari buruz. Arrietaren esanetan, “haurrentzako atmosfera erakargarria eskaintzen” du Larreategiren narrazioak, eta “haurrengana hurbiltzeko bi baliabide proposatzen” ditu: “Abere pertsonifikatuak eta abentura”. Hausnartu zuen, gainera, ipuinaren bidez “handiok askotan atzean uzten goazen altxorrak oparitzen” dituela idazleak, besteak beste, “jolasa”. “Berriro haurrak izatera jolasteko gonbita luzatzen” du egileak Arrietaren arabera, “fantasia, abereak, jolasa eta lagunak” uztartuta, nagusiki.
