Sortzaile handiak ere organikoa sailkatzera animatu nahi ditu Lea-Artibai Amankomunazgoak
Kanpaina bat abiarazi dute taberna, jatetxe, ostatu, janari denda eta elkarte gastronomikoak ere gai organikoa modu egokian sailkatzera gonbidatzeko. Gaur [apirilak 21] aurkeztu dute ekainaren amaierara arte martxan egongo den kanpaina.
Luis Kazalis Lea Artibai Amankomunazgoko Lurralde antolaketa zerbitzuko teknikaria eta Koldo Goitia Lea Artibai Amankomunazgoko lehendakaria kanpainaren aurkezpenean. Lea-Artibai Amankomunazgoak Egin lekua organikoari izeneko kanpaina berezi bat abiarazi du sortzaile handiak –taberna, jatetxe, ostatu, janari denda eta elkarte gastronomikoak– gai organikoa sailkatzera eta bosgarren edukiontzia erabiltzera animatzeko. Koldo Goitia Lea Artibai Amankomunazgoko lehendakariak eta Luis Kazalis Lea Artibai Amankomunazgoko Lurralde antolaketa zerbitzuko teknikariak aurkeztu dute ekimena gaur [apirilak 21]; kanpaina aste honetan hasi eta ekainaren amaierara bitartean luzatuko da.
Lea Artibai Amankomunazgoko lehendakariak jakitera eman duenez, aste honetan hasi dira teknikariak ostalaritzako establezimendu, denda eta elkarteetako arduradunei deiak egiten organikoari euren establezimenduetan lekua egiteko proposamena luzatzeko. “Gure helburua establezimenduetan organikoa sailkatu eta bosgarren edukiontziaren erabilpena bultzatzea da, organiko kopurua gehitzeko“.
Kanpaina hilabete bitan egingo da, eta Lurralde antolaketa zerbitzuko teknikariak azaldu duenez, sortzaile handiekin zuzeneko kontaktuan jarriko dira. “Astelehenean hasi ziren deiak egiten, eta gero bisitak egingo dira. Bisita horietan organikoa banatzeak dituen onurak azalduko zaizkie, eta materiala hartzeko aukera emango zaie. Material sortak bi motatakoak izan daiteke: 10 litroko pote txikikoa, edo bestela, 40 litroko balde handi bat eta bere tamainako poltsak dituena”.
Guztira, 263 jarduera ekonomiko bisitatuko dituzte, baita elkarte gastronomikoak ere. “Itxita badaude ere elkarteetako arduradunekin kontaktuan jarriko gara eta horiei ere emango zaie materiala, kanpainaren nondik norakoak azaltzen dituen esku orria, eta baita organikoa nondik ateratzen den eta ontzi horretara zer bota daitekeen azaltzen duen kartela ere”.
Gaur egun, eskualde mailan 1.000 tona organiko batzen dira. Organiko kopuruaren gorakada moteltzen ari dela esan dute
Kanpaina indartzeko, gainera, sei astetan informazioa zabalduko dute hedabideen bidez. “Aste bakoitzean bideo txiki bat kaleratuko dugu, establezimenduek organikoari zelan egiten dioten lekua erakusteko, eta lelo batzuk eta argazkiak ere zabalduko ditugu”.
Kazalisek azaldu duenez, jadanik badaude organikoa banatzen duten taberna, ostatu eta elkarte gutxi batzuk, baina gehiagorengana heldu nahi dute. Hala ere, organikoa banatzen ari diren horiei ere bisita egingo diete teknikariek, ezelako arazorik badaukate konpontzeko.
Motelduta. Lea Artibai Amankomunazgoko teknikariak jakitera eman dutenez, gaur egun, eskualde mailan 1.000 tona organiko batzen dira, horiek BFA konpostegira bidaltzen dituzte, eta bertan konposta egiten dute. Eta, badaramatzate urte bi, gainera, konposta bertora ekartzen, nahi duenak eskuratu ahal izateko. Hala ere, organiko kopuruaren gorakada moteltzen ari da. “2017 eta 2018 urteetan organikoaren igoera nabaria izan zen, baina azken urte bietan moteldu egin da handitze abiadura hori, eta beraz, pentsatu dugu sektore hau oso interesgarria dela organiko kopurua handitzen joateko, batez ere, jatetxe, taberna eta ostatuek sortzen duten gai organiko kopurua oso handia delako”.
Ikastetxeetako jantokiak eta nagusien egoitzak ere sortzaile handien artean kokatzen dituzte, baina horiek sarean sartuta daudela argitu dute. “Denbora badaukagu, horiengana ere joango gara, eta kanpaina azalduko diegu”.
