Langileen aldarriak, kalean
LABek mobiliziazioa egin zuen Ondarroan, eta egoerak greba orokorra eskatzen duela aldarrikatu zuen. ELAk eskubide gehiago eta murrizketa gutxiago aldarrikatu zituen. Lekeition eta Mutrikun ere mobilizazioetan elkartu ziren langileak.
LAB sindikatuak deitutako Maiatzaren Leheneko mobilizazioa Ondarroan. Argazkia: Turrune. Maiatzaren Lehenean langileen aldarrikapenak ozen entzun ziren herriko kaleetan. Iazko deialdi birtualetatik kaleetara egin zuten salto beharginek. Eraldaketarako garaia zela esan zuten LABek eta ELAk deialdietan, eta hala berretsi zuten zapatuko mobilizazioetan. Hiriburuetan batu ziren sindikatuetakoak, baina LABek deialdi bereziak egin zituen eskualdeka, tartean Ondarroan. Lekeition eta Mutrikun ere mobilizazioak egin zituzten herri mugimenduek.
Mezu argia eta zuzena bidali zuen LABek Ondarroan: “Egoerak beste greba orokor bat eskatzen du, eta LAB greba orokorrerako adostasunak sortzen hasteko prest dago”. Pandemiaren osteko garaian “indartsu sartzeko” litzatekeela greba adierazi zuten sindikatuko ordezkariek, baita egungo politika publikoen norabidea aldatzeko ere. “Langileen borrokan mugarri berriak jarriko ditugu, greba eta mobilizazio berriei baietz esango diegu, eta borroka batzuen eta besteen konfluentziak bilatuko ditugu”.
Izan ere, ez dela enplegu duinaren aldeko apusturik egin salatu zuen LABek: “Ez dago zerbitzu publikoak indartzeko asmorik, zaintza krisian dago, eta krisi ekologikoak irtenbiderik barik jarraitzen du. Kapitalismoan, langileak ez gara demokrazian bizi. Sistema hau luzatzeko patronalak esku-eskura ditu estatuaren botere bortitz guztiak, legegilea, judiziala eta poliziala”.
Horren aurrean, sindikatuak badituela estrategiak azaldu zuen. “Bizitza duinaren bidean jarri beharko ditugu gure estrategiak, eta kapitalaren gainetik, langileon bizitzak jarriko ditugu”, adierazi zuten, eta sindikatuaren ikur diren bi egitasmoen premia gogoratu zuen: Euskal Herriko Lan Kodea eta Gizarte Segurantzarako lege propioa. “Aldaketa ez da egun batetik bestera gertatuko, eredu zaharretik eredu berrira trantsizioa egin behar da, trantsizio ekosoziala eta feminista. Hori da alternatiba”.
Hori horrela, enplegu duinaren, zerbitzu publikoaren, zaintza sistema publiko eta komunitarioaren alde eta pentsioen defentsan jarraituko du lanean sindikatuak, betiere mugimendu feministaren, pentsiodunen eta gazteen bidelagun izanez. LABen mobilizazioan hainbat kolektibok parte hartu zuten: gazteek, emakumeek, pentsiodunek… eta denen aldarrikapenek izan zuten euren lekua.
Aurten lanean hildako 18 langileak ere gogoratu zituzten ekitaldian, izan ere, lore eskaintza eta agurra dantzatu zieten. 2016an Ondarroako izotz fabrikan hildakoen senideek gainera, plaza erdian ipinitako suontzia piztu zuten.
ELAk ere “aldaketarako garaia” dela aldarrikatu zuen, 2008ko krisiaren formulak ez errepikatzeko. Hori eragozteko, “ezkerreko atea” joko duela esan zuen Mitxel Lakuntza idazkari nagusiak Bilbon: “Eskubide gehiago eta murrizketa gutxiago dakarren atea”. Sindikatuak azken hilabeteetan egindako eskaeren garrantzia azpimarratu zuen Lakuntzak.
Erreforma fiskala “ezinbestekoa” dela gogoratu zuen, “krisi honetako faktura zeinek ordainduko duen baitago jokoan”. Idazkari nagusiaren berbetan, “gehien dutenek gehiago ordaindu” behar dute.
