Ondarroako Kultur Uheri ekimenean parte hartzeko izen ematea zabaldu dute
Herriko kultur taldeei euren sorkuntzak taularatzeko aukera eman nahi die udalak. Proposamenak maiatzaren 14ra arte bidali daitezke.
Iñaki Maruri, Mitxel Santa Marina eta Ismael Pereira, Inpro_Komeryak ikuskizuneko protagonista, kiroldegian. Argazkia: Ondarroako Udala Koronabirusak eragindako egoera ikusirik, Kultur Uheri ekimena bigarrenez antolatuko du Ondarroako Udalak. Iaz hainbat herritarrek taularatu zituzten beraiek sortutako proposamenak, eta aurten ere herriko talde eta norbanakoei Ondarroako plaza eskaintzeko asmoa agertu dute. Bertan parte hartzeko aukera zabaldu diete herriko sortzaileei, “euren espazioa eduki dezaten”; maiatzaren 14ra arte dago izena emateko epea zabalik.
Ekimenean parte hartu nahi duten sortzaileek jrosa@ondarroa.eus posta elektronikora bidali beharko dituzte euren proposamenak. Izena ematerako orduan proposamenari buruzko ahalik eta informazio gehien zehaztea eskatu dute; besteak beste, aurrekontua, formatua, proposatutako lekua, iraupena eta bestelako xehetasunei buruzko azalpenak bidali beharko dira. Argibide gehiago eskuratu nahi dutenek 94-683 36 69 telefonora ere deitu dezateke.
Zehaztu dutenez, uztailaren 30etik abuztuaren 29ra bitartean egingo dute aurtengo ekimena.”Egoera zein den ikusirik eta Andra Mari jaien inguruan zelako ekintzak antolatu daitezkeen esaterik ez daukagunez, aurten ere Kultur Uheri ekimenaren alde egitea erabaki dugu. Iaz oso erantzun ona eduki zuen eta aurten ere ekimen hau berriz antolatzea erabaki dugu”, agertu du Aritza Aristondo Natxiondo kultura zinegotziak.
Kultur Uheri ekimena antolatuko bada ere, Andra Mari jaiak ospatu ohi diren egunetan hainbat ekintza egitea ez dutela baztertzen azpimarratu dute. “Hori aurrerago ikusiko da. Ohiko Andra Mari jairik ez da antolatuko, baina zer egin eta nola egin aurrerago erabakiko da. Iaz egin modura baliteke urteroko ekintzaren bat egin ahal izatea, betiere beste formatu batean, segurtasuna mantentzeko”.
