Elkarretaratzea egin dute Nemak enpresan, bi langileren kaleratzea salatzeko

Jakitera eman dutenez, 58 urteko langile bat eta ezintasun bategaz dagoen langile bat kaleratu nahi dituzte.

2021/05/19

Etxebarriko Nemak enpresako beharginek kalera atera dira gaur [maiatzak 19] langile bi kaleratu nahi dituztela salatzeko. Jakitera eman duenez, 58 urteko langile bat eta ezintasun bategaz dagoen langile bat kaleratu nahi dituzte.

“Kaleratu nahi duten langileetariko bat 58 urteko langile bat da. Lau urtez lan-kontratu finkoagaz lanean aritu ondoren, enpresak kalera bota nahi du argudio sinplista bezain sinesgaitza aitzakia modura erabiliz”, azaldu dute.

58 urteko langileari kaleratzeak kalte handia eragingo diola azpimarratu dute: “Argi dago bizitza izorratuko diotela langile honi, bere jubilazioa pikutara bota diote jakinda enpresan badaudela aukera ezberdinak: lanpostuz aldatu, beste lan baterako formakuntza eman, eta lan egin dezala beste urtetxo batzuk errelebo kontratua egin ahal izateko, edo aurrejubilazio bat adostu beragaz bi edo hiru urte barru”.

Ezintasunagaz. Kaleratu nahi duten beste langilea ezintasun bategaz dagoela azaldu dute, eta bere lanpostuan ezin duela lanik egin, “bai ordea beste lanpostu batean”: Bizitzak eta osasunak eman dion kolpearen ostean, hainbeste urtetan lan egin duen bere lantokiak errematatu du. Ez omen dago berari egokitu ahal zaion posturik enpresan. Langile hau ere ez dute nahi enpresan eta kale gorrian aurkitu ahal da bere ezintasun eta guzti”.

Nemak enpresako beharginak, elkarretaratzean.

Diotenez, enpresak zenbait lanpostu egokituta eduki behar ditu, langile horren moduko kasuak ematen direnean, lanpostua aldatu ahal izateko. “Baina hori egitea baino nahiago dute kale gorrian utzi”.

Kaleratze horiek “onartezinak” direla azpimarratu dute, eta egin beharreko guztia egiteko prest daudela esan dute “gure lankideak berriro lanean birkokatu arte”. Nemakeko langileen iritziz, “badaude aukerak” eta “garai hauetan familia bi miserian uztea ez da onartu daitekeen aukeratako bat”.