Irisgarritasun Plana onartu dute Markina-Xemeinen
Plana aurrera begirako gida bat izango dela jakitera eman dute. Lehen neurria Esperantza eraikinean igogailua jartzea izango da.
Markina-Xemeingo Udalak Irisgarritasun Plana onartu du. Lehendik zegoena oinarri hartuta landu dutela jakitera eman dute. «Bertan jaso dira Markina-Xemein %100 irisgarri izateko hartu beharko liratekeen neurriak. Horretarako, gaur egun iriste erraztasunari lotuta herrian dauden gabeziak detektatu dira, bai bide publikoan, udal eraikinetan eta baita garraioari dagokionez ere, eta gabezia horiek konpontzeko hartu beharreko neurriak proposatu dira».
Plana aurrera begirako gida bat izango dela azaldu du udalak: «Datozen urteetan, irisgarritasun arloan nondik jo jakiteko eta aurrera begira lehentasunak finkatzeko».
Plan berriari lotutako lehen ekimena ere esku artean daukate. Esperantza eraikinean igogailua jarriko dute, hain zuzen ere. Eraikin horrek, gero eta erabilera gehiago duela nabarmendu dute: «Besteak beste, bertako areto nagusia geroz eta gehiago erabiltzan da hitzaldi, proiekzio eta bestelako kultur ekitaldietarako».
Diru laguntzak. Asteleheneko osoko bilkuran diru laguntzen plan estrategikoa ere onartu zuen udalak. Plangintza horren baitan hiru urtetarako diru laguntzak finkatu dituzte, 2021, 2022 eta 2023 urteetakoak, eta sei arlotako laguntzak zehaztu dituzte: kultura, aisia, kirola, gizartea, euskara eta herriko jaiak.
Azaldu dutenez, kultur, kirol eta gizarte arloko elkarteek antolatzen dituzten ohiko ekimenetako laguntzak udalaren aurrekontu orokorreko gastuen egoera orrian zehaztuko dituzte, eta hitzarmenen bidez bideratuko dira. «Behin plan estrategikoa Osoko Bilkuran onartuta, talde guztiei bidaliko zaie eta epe bat zehaztuko da talde bakoitzak eskaerak egiteko».
Euskara arloko diru laguntzei dagokienez, berriz, Euskara ikasteko eta Euskarargaz lotutako jarduerak egiten dituzten erakunde publiko edo pribatuentzako zuzeneko laguntzak emango ditu Udalak.
Jaien arloan, Karmen jaiak, San Migel jaiak eta auzoetako jaiak mantentzeko eta sustatzeko ildo nagusiak zehaztu dituzte planean, «herritarrek festen antolaketan parte hartzea bultzatuz»
