Munitibarko Udalak udaberriko agendaren bigarren zatia aurkeztu du

'Hor konpon Maria Anton' umeentzako ikuskizuna, gaztetxoei eta helduei zuzendutako 'Luze edo motz' emankizuna eta Karmele Jaio idazleagaz 'Aitaren etxea' liburuari buruzko irakurketa txokoa egingo dituzte ekainean.

Aintzina Monasterio Maguregi

Munitibar

2021/05/28

Munitibarko udaberriko agendaren bigarren zatiaren lehenengo ikuskizuna ekainaren 4an [barikua] egingo dute. Hor konpon Maria Anton umorea, bertsolaritza eta txotxongiloak uztartzen dituen umeei zuzendutako ikuskizuna 17:00etan hasiko da, udal aretoan. 30 pertsonako aforoa ezarri dute. Sare sozialak, telebista eta oro har egungo gailu elektronikoen erabilera landuko dute istorio horretako Joni protagonistarekin: “Makinita arruntak denon eskuetan daude, baita gure seme-alaba txikienen eskuetan ere. Ikasi behar dugu makinekin gozatzen, baina menpean erori gabe”.

Urtaro hau amaitu bitartean, hiru ekitaldi egingo dituzte, aste bakoitzeko bana. Orain artekoak modura, doakoak dira, baina aurretiaz izena ematea derrigorrezkoa da, aforo mugatuekin egiten diren ekitaldiak direlako. Izena emateko 9:30etik 14:00era, udal administraziora eta 16:00etatik 20:00etara, berriz, liburutegira deitu edo hurreratu behar da. Hala ere, gogoratu dute jarleku guztiak betetzen ez badira, ekintzen egunetan aforoa bete arte sartzeko aukera ematen dutela.

Ekainaren 11an Luze edo motz emankizuna eskainiko dute Mirari Martiarenak eta Idoia Torregaraik, 18:30ean, udal aretoan, eta ekainaren 18an irakurketa txokoan Karmele Jaio idazleagaz batuko dira Aitaren etxea liburuari buruzko solasaldian, udal aretoan (19:00).

Luze edo motz emankizuna 12 urtetik aurrerakoentzat izango da. Gehienez 28 pertsona sartu ahalko dira udal aretora, eta beraz, astelehenetik [maiatzak 31] aurrera izena eman ahalko da. Bakean dagoena bakean utzi emankizunaren haritik jarraituz, ikuskizun honetan generoa hartuko dute umoregai, gure gizartea zertan luze eta zertan geratzen den motz galdetzeko. Horretarako, hilekoa, menopausia, ligatzeko teknikak eta sexua izango dituzte hizpide, besteak beste. Kritika eta umorea batzen dituen emanaldia da.

Ekintza guztiak Munitibarko Udalak idatzitako protokoloan ageri diren baldintza eta segurtasun neurri guztiak errespetatuz egingo dituzte.