Mutrikuko futbol zelaiaren berdegunea aldatzen hasi dira
Trailerrak gaur [ekainak 9] goizean hasi dira kendutako belarra eramaten; zirkulazioa txandaka zuzentzen ari dira deskarga lanak egiteko. Lanak ondo bidean badoaz uztailaren 23rako amaituko dituzte.
Mutrikuko San Migel futbol zelaian belar artifiziala aldatzeko lanak Asteon hasi dituzte Mutrikuko San Migel futbol zelaiko belar artifiziala aldatzeko lanak. Udalak adierazi duenez, lehengo belarra txarto zegoen “erabiliaren erabiliaz” eta hori dela eta, dena aldatuko dute. Zehaztu dutenez, “kalitatezko eta azken belaunaldiko” belar artifiziala ipiniko dute, “punta-puntako teknologia” erabiltzen duen eta Nazioarteko Futbol Federazioak ematen duen ziurtagiria duen FIFA quality pro mailakoa. Lanak ondo bidean badoaz uztailaren 23rako amaituta edukitzea aurreikusten dute.
Makinak martitzenean [ekainak 8] sartu ziren belar artifizala kentzera eta gaurko [ekainak 9] dena kenduta eta eramanda edukitzea aurreikusten dute. Trailerrak goizean hasi dira kendutako belarra eramaten, eta horrek eragozpenak sortu ditu zirkulazioan; 10:00etatik 13:00etara eta 18:00etatik 20:00etara zirkulazioa txandaka zuzenduko dute obra egiten ari diren langileek. “Aurrerago, belar artifizial berria iristen denean, deskarga kontuengatik ere itxi egin beharko da bideetako bat. Oraindik ez dakigu zein izango den egun zehatza”.
Hurrengo astean, berriz, lurzorua berdindu, oinarria trinkotu eta kanaletak garbituko dituzte. Data horietan, gainera, Herbereetatik datorren belar artifiziala helduko da; ekainaren azken astean hasiko dira belar artifizial berria ipintzen. Uztailaren lehen egunetan, aldiz, seinaleztapen eta margoketa lanak egingo dituzte; futbol 11n eta 8an eta errugbian jokatzeko moduan prestatuko dute zelaia. Azken ukituak eman eta gero, kirol ekipamendua ipiniko dute.
Mutrikuko futbol zelaiaren ondoko aparkalekuaren itxura, kamioiak lurra apurtu ondoren.
Futbol zelaiaren alboan dagoen aparkalekuaren zati bat ere ez dago erabilgarri. Lanak egiten ari diren enpresako kamioi batek aparkalekuko lurra apurtu du. Udal iturriek esan dutenez, kamioia “pisutsuegia” zen, eta horren ondorioz apurtu da. Iragarri dutenez, obraz arduratzen ari den enpresakoek egingo dituztek aparkalekuko konponketak.
