Arantza Herrian! dinamikak mobilizazioak deitu ditu Lekeition
Uztailaren 12an hasiko den 13/13 epaiketako auzipetuei babesa adierazteko ekimenak iragarri dituzte datorren hilabeterako. "Epaiketa bertan behera geratzea nahi dugu, eta Arantza eta besteak herrian nahi ditugu", azpimarratu dute.
Arantza Herrian! dinamikaren prentsaurrekoa. Argazkilaria: Arantza Herrian! Arantza Herrian! dinamikak prentsaurrekoa eman zuen atzo [ekainak 13] Lekeition, uztailaren 12an Espainiako Auzitegi Nazionalean hasiko den zortzi euskal herritarren kontrako 13/13 auziaren epaiketaren harira. IrtenBidera ekinbidearen baitan, asteak daramate Lekeition dinamika lantzen, eta aurrera begira antolatu dituzten elkartasun ekimen eta mobilizazioen berri eman zuten.
Arantza Zulueta Lekeitioko bizilaguna da 13/13 kasuko zortzi inputatuetako bat. Zuluetagaz batera Iker Sarriegi, Jon Enparantza, Julen Zelarain, Naia Zuriarrain, Saioa Agirre Arauko, Nerea Redondo Otamendi eta Juan Maria Jauregi epaituko dituzte. Fiskalak denentzako 77 urteko espetxe zigorra eskatzen du, 19 urteko zigorra Zuluetarentzat. Arantza Herrian! dinamikako kideek diotenez, denboraz eta tokiz kanpo dago eskaera hori: “kartzelak husteko garaia da, ez betetzen segitzekoa”.
Operazio poliziala “Ezker Abertzalea konfrontazio armaturik gabeko agertoki politiko berria eraikitzeko oinarriak gorpuzten ari zenean” gertatu zela ekarri dute gogora, eta atxiloketak “babes legalik barik” eman zirela salatu dute: “CNI eta estatuko estolden inplikazioagaz frogen manipulazioa argia, eskubideen urraketak eta tratu txar zein tortura gogorrak eman ziren. Hori da epaiketa honen oinarria, besterik ez”.
Beraz, epaiketa salatu eta Zulueta eta beste auzipetuen aldeko ekimenak egingo dituzte Lekeition hurrengo hilabetean. “Euskal preso politikoen eskubideen alde egiteagatik izan ziren Arantza eta beste zazpi lagunak atxilotuak, jazarriak, torturatuak eta espetxeratuak. Egun presoen egoera ez da asko hobetu. Pauso txikiak aurrera ematea lortu badugu ere, larria da Pototo eta Liherren egoera. Salbuespen neurriak bertan behera geratzeko bide asko daukagu oraindik egiteke”.
Herritar guztiak gonbidatu dituzte elkartasun ekimenetan parte hartzera. “Gure gonbidapena herritar orori elkartasun ekimenetan parte hartu eta epaiketa honen aurrean kalera irteteko. Epaiketa hau bertan behera geratzea nahi dugu, eta Arantza eta besteak herrian nahi ditugu”.
EKIMENAK:
- Ekainak 18: Mahai ingurua auziperatuagaz, 18:30ean, Abaroa parkean.
- Ekainak 25: Zine foruma, 20:30ean, Kontzijopean.
- Ekainak 26: ‘8 auziperatu 8 orduz elkartasuna’ ekimena, 12:00-20:00, Eskolapean.
- Uztailak 10: Manifestazioa 12:00etan, Bilbon.
- Uztailak 12: Epaiketa hasiera, 19:00etan elkarretaratzea, Eskolapean.
- Uztailak 31: Elkartasun Eguna.
