Deustu eta Zierbena nagusitu dira Antiguako Ama estropadan
Ondarroa Arraun Elkarteko gizonezkoen taldea bigarren eta emakumezkoena bosgarren sailkatu dira. Lekittarra seigarren sailkatu da emakumezkoetan zein gizonezkoetan.
Argazkia: Bermeo Arraun Argazkiak. Emakumezkoetan Deustu eta gizonezkoetan Zierbena izan ziren azkarrenak zapatuko [ekainak 12] erlojupekoan, Ondarroako uretan. IX. Antiguako Ama Estropadan etxeko taldea ere aurretik ibili zen: bigarren sailkatu zen gizonezkoetan eta bosgarren emakumezkoetan. Lekeitioko arraun taldea, berriz, seigarren geratu zen bi estropadetan.
Gizonezkoen taldeak, mailaren araberako hiru txandatan banatuta lehiatu ziren, eta Eusko Label Ligako sei taldek osatu zuten hirugarren eta azken txanda, eta horiek izan ziren azkarrenak. Hogei minutu, bost segundo eta 55 ehunenetan burutu zuen denboraldi-aurreko azken estropada Zierbenak. Bost segundo eta 32 ehunen atera zizkion Ondarroari. 66 ehuneneko aldea egon zen Ondarroa bigarrenaren eta Urdaibai hirugarrenaren artean. Santurtzik laugarren amaitu zuen, erlojupekoa hogei minutu, hamasei segundo eta 50 ehunenetan amaituta. Zarautzen eta Lekittarraren artean ere alde estua egon zen; segundo bat eta 40 ehunen barruan sartu ziren biak.
Argazkia: Bermeo Arraun Argazkiak.
16 traineruk lehiatu zuten gizonezkoen erlojupekoa, eta emakumeetan, ostera, bederatziren artean erabaki zen bandera. Lehenengo bien artean alde estua egon zen. 11 minutu, zazpi segundo eta 80 ehuneneko markagaz irabazi zuen Deustuk. 44 ehunen atera zizkion Zumaia bigarrenari.
Hibaika (11.19,72) eta San Juanen (11.24,07) atzetik sailkatu ziren Ondarroa eta Lekittarra. 11 minutu, 35 segundo eta 47 ehuneneko denbora egin zuten etxeko arraunlariek, eta Lekeitiokoek 11 minutu, 47 segundo eta 65 ehunenetan.
Argazkia: Bermeo Arraun Argazkiak.
