Mutriku bosgarren sailkatu da Erandioko jardunaldian
Argazkia: Potronko. 2021eko Lur Gaineko Euskadiko Sokatira Txapelketaren 600 kiloko lehen jardunaldia Erandion lehiatu zuten zapatu arratsaldean [ekainak 12], eta Mutriku Sokatira Taldea bosgarren sailkatu zen. Gaztedi A eta Goiherri 6,5na puntugaz berdinduta geratu ziren. Gaztedi B hirugarrenak 5 puntu lortu zituen, eta 4 puntu Akelarre laugarrenak. Mutrikuren atzetik Geto eta Gaztedi C sailkatu ziren.
Taldeak 640 kilotik 600 kiloko kategoriara pasatu dira astebetean eta, beraz, denentzat ere lehen helburua pisuan sartzea izan zen. Mutrikuk taldekideen artean aldaketa bakarra egin zuen. “Bertara ailegatu arte esperantza onekin geunden. Bertara joan eta besteak ze taldeekin zeuden ikusi genuen. Gure mailan ibili ginen”, adierazi du Javi Urresti Mutriku Sokatira Taldeko kideak.
600 kiloko kategorian hobeto aritzeko talde lehiakorragoa osatzeko apustua egin zuten denboraldi hasieran: “Talde beteranoagoa sartzea zen asmoa. Finalean beste beterano bat faltako da, lan kontuengatik ezingo duelako joan, eta beraz, ea zapatu honetarako lortzen dugun urte batzuk daramagunekin taldea osatzea”. Bigarren jardunaldirako kilo batzuk kendu beharko dituzte: “Zapatuan eman genuen pisutik, bakoitzak gutxienez beste kilo bat jaitsi beharko dugu”.
600 kiloko bigarren jardunaldia Getxoko Zubilletako parkean jokatuko dute zapatuan [ekainak 19], 17:00etatik aurrera. Berriro ere zazpi taldeak denak denen aurka lehiatuko dira.
Urrestiren esanetan, Gaztedi Ak “bere maila ere gainditu” du aurten: “Nahiz eta zapatuan bere etxean Goiherrigaz berdindu egin zuen, ikusi da zelako nagusitasunagaz irabazten ari den. Horrek esan nahi du Gaztedi Aren moduan, Gaztedi B ere maila onean dabilela. Goiherrik 600ekoa ez bada 560koa lortu nahiko du, eta ea maila hartzen duen oraingoan. Ikusi beharko da datorren zapatuan Getxon zer gertatzen den”.
Argazkia: Potronko.
