Terrazak egokitzeko laguntzak eman dituzte Markina-Xemeinen
Ia 35.000 euro banatu ditu udalak. Terrazak haizetik babesteko itxitura gardenak eta euri nahiz eguzkitarako balio duten eguzkitakoak jartzeko inbertsioak diruz lagundu dituzte.
Markina-Xemeingo Sakris tabernako terraza. Argazkia: Markina-Xemeingo Udala Markina-Xemeingo ostalariek euren terrazetan inbertsioak egitea diruz lagundu du Markina-Xemeingo Udalak. Azaldu dutenez, pandemia egoeran aire zabaleko espazioak bilakatu dira toki seguruenak, eta ostalaritzaren kasuan, terrazetan baimendu dira soilik %100eko edukierak. «Egoera horren aurrean, ostalaritza aktibitateek terrazetan zerbitzua emateko beharrezko dituzten inbertsioetan lagundu nahi izan da udaletik».
Terrazak haizetik babesteko itxitura gardenak eta euri nahiz eguzkitarako balio duten eguzkitakoak jartzeko inbertsioak finantzatu ditu udalak, hain zuzen ere. «Azken hauen kasuan, bi kolore zehatzekoak dira, zuriak eta beltzak, eta horrekin uniformetasun estetiko bat lortu da herriko paisaian. Gainera, elementu mugikorrak dira jarri direnak, ez finkoak».
Ostalariek egin duten ahalegina eta inbertsioa eskertu ditu udalak. «Zalantzarik gabe, herritarrak izango dira onuradunak, beraiek izango direlako terrazetan erosoago eta seguruago egoteko aukera izango dutenak, uda nahiz negu, eguraldiak baldintzatu gabe».
Kopuru handiagoa. Jakitera eman dutenez, hasiera baten 27.000 euro bideratu zituzte laguntza horietara, baina partida igotzea erabaki zuten, 35.000 eurora arte. Horrela, deialdiaren oinarrietan eskatutako baldintzak betetzen zituztela ikusita, 34.716,17 euro banatu ditu Udalak, herriko 11 establezimenduren artean: Sakris, Ilunpe, Iru-Zubi, Kintal, Patxu, Melo’s, Vega, Buztarri, Tate, Naroki eta Bikale.
Bestalde, Uhagonen jarriko den azpiegitura udalak ordainduko du, eta Mayoren kasuan, Kontzekupea babesteko albo toldo bat jarriko dute.
