Bertso giroan ospatu dituzte sanjoanak Amallon
Meza eta bertso saioa egon ziren atzo [ekainak 24] San Joan eguna ospatzeko. Saio ederra eskaini zuten bertsolariek, eta giro ona izan zen nagusi.
Alaia Martin, Garazi Navarro, Sustrai Colina eta Xabat Galletebeitia bertsolariak Amalloko oholtzan. COVID-19a dela eta, beste urte batzuetan baino modu xumeagoan, baina betiko giro onean ospatu dituzte jaiak Markina-Xemeingo Amallo auzoan. San Joan eguneko meza eduki zuten atzo [ekainak 24] goizean eta mokadutxoa ondoren. Arratsaldean berriz, bertso saioa egon zen Alaia Martin, Garazi Navarro, Sustrai Colina eta Xabat Galletebeitia bertsolariekin. Erantzun ona eduki zuen saioak, hitzorduari ez zioten hutsik egin nahi izan auzotarrek ez eta ingurukoek ere, eta jendea batu zen Amalloko tontorrean.
Amalloko jai batzordeko Joseba Sololuze aritu zen gai jartzaile, eta haren aginduetara aritu ziren koplatan lau bertsolariak. Laurak batera ariketa batzuk egiten jarri zituen Sololuzek, eta bakarka ere bai. Denetariko gaiak egon ziren, San Joan suak edota auzo txikien ingurukoak besteak beste. Errima jokoak eta lehiaketa txiki bat ere egin zituzten; nork herri gehien esan aritu ziren lehian.
Saio ederra eskaini zuten bertsolariek, eta giro ona izan zen nagusi.
